Tesayurtem nem mapang shitak nung itasen agütsütsüla: NPCC

Dimapur, November 6 (TYO) : SSA tesayurtem nem ita trok tashi itasen magütsüi aruba sülen parnok dak tzü kahloktsübaji kodanga mongudangba itasen agütsüba lir. Sorkari tesayurtemi achi-ajem mesüi mapa inyaktsü imlar süra, ibaji khenyongi mashilen tangatetba ka lir, ta Media Cell, NPCC-i sangdong ka nung metetdaktsü.
State sorkari ita trok sülen saksalemra, sorkarji süchia orr aliba liasü. India sorkari sen magütsüba ajanga itasen magütsür ta tai tongloktsü ajanga state sorkari tamakok anguba menembangtettsü, kechiyong India sorkari ita trok tashi itasen sota ayutsü sentong kecha mali saka iba ya state sorkari tim mesüi amshiba aser junga ketdang masüba ajanga dang lir, ta NPCC-i sangdong nung ashi.
Tesayurtemji nisung ajaki akhümtsübu agütsürtem lir. Bus, train, okadak amala nung tesayurtem nem akhüm agüja menden azüngtettsür, ano linük kar nungbo parnok nem tetushi agüja maongka balala agütsür, kechiyong tarutsüji parnok dak keta lir. Anungji, tesayurtem nem mapang shitak nung itasen agütsütsüla aser state sorkari tatemtsü agütsüba magizüker, ta NPCC-isa metetdaktsü.