Tesayurtem training magiba aser tesayur peria maliba school tem ajanga ‘quality education’ magütsüteter

Kohima, November 7 (TYO): Nagaland nung sorkar school tesayurtem 24,000 den tema lir aser parnok rongnungi noklang nung shilem 42 ji training magirtem aser ano sorkar school tem noklang nung shilem 15 (school 172) nungbo tesayur kati dang repranger, ta Nagaland School Education & SCERT Minister, Yitachu-i ashi.
Item onükji ajanga Nagaland nung quality education agütsütsü merangba mapa nung tetsükdaktsü ajurur, ta pai shisem.
Indian Council of Social Science Research (ICSSR)-i anogo ananü atema “Quality Teacher Education: Issues and Challenges of two year Bachelor of Education (B. Ed)” National Seminar lapokba sentong nung tanü Yitachu-i iba osang metetdaktsü.
Iba sentong ya Department of Teacher Education aser Nagaland University, Kohima Campus, Meriema kübok Department of Education nati külemi ayongzük.
Centre sorkari tenzükba Right to Education (RTE) policy ajanga infrastructure yanglushiogo aser school aika jenjang ajungketogo. Ajisüaka, iba maparen ajanga kaketshir nem ‘quality education’ agütsüba nung ongdang tulu ka adokdaktsüogo aser iba ajanga school tom nung toktsürtem aser sorkar school tem nung enrolment ajema kümdaktsü, ta School Education & SCERT Minister-i ashi.
Pai ashiba agi, Nagaland nung sorkar school noklang nung shilem 30 (school 622) nung taküm academic session nung kaketshir 30 dang enroll süa lir.
“No Detention Policy ajanga quality education agütsüba mapa nung tamakok angu kechiyong kaketshirtemi lesson junga mekokaka class temai ajungket. Quality education agütsütsü atema education system yanglushitsüla aser ibaji tesayurtem indang education system nung keta lir. Tesayurtemi training tajung agitsü mulungtettsüla aser tesayurtem dak ochishiba aser nendaka inyakba tangatetba nung loktiliba nung temelenshi bener arutsü atema temulungtetba alitsüla” ta paisa shisem.
Nagaland nung training magiba tesayurtem training agitsü asoshi mapa inyaker aser in-service tesayurtem B.Ed training agidaktsür. Parnok training agiba mapang sorkari substitute teachers ayur, ta paisa metetdaktsü.
Sentong nung Sri Venkateswara University, Andhra Pradesh, Dean, Faculty of Education, Prof P A Reddy-i okila jembidang, teachers’ education programme jenjang tajungba kümdaktsütsü nüngdaker, ta ashi.
Item sentongtemji quality education nung ajemdaker agitsüla aser tesayur indang mapa inyakbaji employment atema dang masü saka profession ka ama asütsüla, ta Prof P A Reddy-i ayongzük.
Sentong nungsa Dean of School of Humanities & Education, NU, Prof Buno Liegise aser Dr. M. Rajendranath Babu nati tayongzükba o jembi.
Sentong nung mendenji Narola Chuba liasü, Head of Department Education, NU, Prof. Lungsang Zeliang-i tesentepertem pela agizük aser Dr. Neizo-ü Mero-i anküp tepela o jembi.