Tesayurtemi asentenshir tejangraba tulu nung inyaktsüla: Mhonlumo

Dimapur, Sept. 06 (TYO): September 05, 2017 nü tang mezüng SDEO, Bhandari town kübok school ajak longjemer tesayurtem anogo mongogo; iba sentong nung tongti tesemdangerji Geology & Mining & Border Affairs Minister, Mhonlumo Kikon liasü.

Tongti tesemdanger o jembidang Mhonlumo Kikon-i Lotha nunger masüba tesayurtemi district atema mapa tajung jenti inyakba atema pelaba lemsatep.

Pai ashiba agi, tesayurtemi pei atema mebilemi kaketshirtem tajung kümdaktsütsü atema nendaka inyakba ajanga tang süngjang tajung tangtsüdar.

Paisa tesayurtem dang asentenshir tejangraba tulu nung inyaktsü ayongzükba den külemi head master tem dang ‘proxy’ tesayurtem tenüng SDEO, Bhandari ket nung agütsütsü mepishi.

Kasa sentong nung ADC, Bhandari, T. Nchumbemo Odyuo-i, SDEO-i iba sentong ayongzükba atema pelaba metetdaktsüba den SDEO Bhandari kübok school temi amalitepa iba sentong nung shilem agiba atema pelaba shisem.

Paisa, tesayurtem linük yangertem lir aser tesayur mapa ya akhümket mapa ka lir, ta ashi.

Sentong nung LLRSU Tir, Lichamo Kikon-i tesayurtem anogo teratet metetdaktsü. GHSS tesayur, Rembemo-i tesayurtem tenüng nung jembi aser DBHSS nungi Limatula-i kaketshirtem tenüng nung jembia liasü.

Iba sentong ya PT, GMS, N. Easther Odyuo leniba nung agi, Vice Principal, DBSS Bhandari, Rev. Fr, Obed-i sarasadem aser SDEO, Bhandari, C. N Dominic-i lokti pelaa agizük.

Sentong nungsa PT, GMS, Akuk N-i ken ka aten aser Co-ordinator, EBRC, Bhandari-i tepela anükp o jembia liasü.