Kohima, September 05, 2015 : Honibar nü Kohima nung Minister Yitachu aser Nicky Kire na School Education Department, SCERT, NBSE ketdangsertem aser State Level Teachers Award 2015 angurtem den külemi tanglokba noksa ka angur.
Kohima, September 5 (TYO) : Lokti nung tesayurtem shilem khenyongi balaka lir aser tanü tesayurtemi sen atema dang masü saka nisung anitettsü aser lokti yanglushitsü atema alizüng yur inyaktsüla, ta Nagaland Chief Minister, T R Zeliang-i tesayurtem ayongzük.
Tesayur tajung ka jagi sempet ajitettsü aser anitettsü asoshi tajitetba yimya alitsüla, ta Zeliang-isa metetdaktsü.
Tanü NBCC Convention Hall, Kohima nung Tesayurtem Anogo sentong agidang School Education & SCERT Minister, Yitachu-i chief minister indang osang zünga metetdaktsü.
Tesayur ka indang tongtipang teinyaktsüji kaketshirtem dang tesayuba tajung aser yimyatsüyatem sayutsüba lir. Tanü kanga dang kara ainba putu nung kaketshir tsürabur anaprongla mapa inyaker aser Facebook ama mesüra internet ajanga amshiba social media nung medemertem yimtetba mapang ka nung tesayurtem asoshi tesüiba mapangtem dang nungi teinyaktsü mapa tuluba lir, ta Zeliang-isa ashi.
Tanü tesayurtemi lanu putu dang temeim, yimjung, taremzük aser tashiyim meinyaktsü tangatetbatem densema tesayuba tajung sayubentsütsüji kanga tongtipang lir, ta paisa ayongzük.
“Tesayur tajungtemi sen atema dang masü saka nisung aser lokti tajungba kümdaktsütsü alizüng yur inyaktsüla” ta Chief minister-isa tesayurtem dang nenshia ashi.
Nagaland state kümtetba mapang azüngtsü-zülutsü metetba jenjang noklang nung shilem 14 dang liasü saka tanü shilem 80 tema kümogo. Tang School Education Department atema wadang tulutibaji sorkar school tem nung tesayurtem mapalem timi inyaktsü asoshi lir, ta Zeliang-isa ashi.
Department of School Education ya 1964 küm tenzük aser iba ya Nagaland nung Department tulutiba lir. Department tenzükba sülen nungi kaketshirtem nüngdak peritsütsü atema inyakyim nung temelenshi aika süogo, ta chief minister-isa shisem.
Sorkar rejutem 956 aliba nungi 3299 jungogo aser tesayurtem 2554 nungi 27,904 shi lir. Nagaland nungsa nija school 500 den timba tenüng züluoka aser sorkar o nija school tem nung kaketshir lakh pungu shi tezüngdak lir. Anungji, state sorkari tawa tu Primary nungi Higher Secondary jenjang tashi nung teaching staff mapalem indang tetuyuba ka agütsü aser iba inyakyim tasenba nung aliba ama kobi melii tesayurtem training aser mapalem tenzüktsü, ta paisa metetdaktsü.
Nija school tem aser item school nung tesayurtemi Nagaland nung shisaluyimba jenjang tajungba kümdaktsür aser iba asoshi parnok dang pelar. Infra-structure peria meliaka aser itasen tajemba nguaka, nija school temi küm shia sorkar school tem dang nungi results tajungba angur, ta TR Zeliang-isa ashi.
Ajisüaka, sorkar school tem aser tesayurtemi tesüiba küm ishika HSLC/HSSLC tatidang nung takok tajung nguyonga arudar aser iba atema parnok nema tenüngsang agütsür, ta Chief minister-isa ashi.
Tanü School Education Minister, Yitachu-ia o jembidang, “Department of School Education-i kaket shisatsü bushiba indang kulikaket angutsü atema dang masü saka human resource development indang tesayubatem agütsütsüla” ta tayongzükba agütsü.
School tem lapokba aser tesayurtem shimbaji lokti nung shilem ajak nem quality education agütsütsü nükjidong nung asütsüla, ta paisa ashi.
Yitachu-isa ashiba agi, Department nung khuret aika lir aser item onük ajakji külemi inyaktsüla.
Tesayurtem Anogo amungdang Department nung tesayurtem aser mapa inyakertem ajaki tali bendanga agütsüshitsü aser külemi longjemer lokti asoshi tetsüdaktsü aliba khurettem koktettsü merangtsükla, ta tanü Yitachu-isa ayongzük.
Nagaland Education Minister-isa Tesayurtem Anogo tenüng nung Hombarnü (September 7) state ajunga nung school tem sodi anogo asütsü osang metetdaktsü.
Tanü agiba sentong nung Kohima nungi G. Rio, Mezhür HSS aser Don Bosco HSS kaketshirtemi shilem balala ajanga tesayurtem tushi aser Ruzhukhrie GHSS nungi kaketshirtemi tesayur nem naro agütsü.
Sentong nung mendenji Commissioner & Secretary School Education, F. P. Solo liasü aser Kohima Ao Baptist Arogo, Associate Pastor, Temjen Sempo-i temoatsü meshia sarasadem aser Mezhür HSS nungi kaketshirtemi asür Dr. S. Radhakrishnan indang Life sketch sayu.
Tesayurtem Anogo sentong nung Forest & Environment Minister, Dr. Neikiesalie Nicky Kire aser Soil & Water Conservation Parliamentary Secretary, Phukayi na aden.
You must be logged in to post a comment Login