Tesayurtemi shisaliok nung technology densema sayutsüla: Tir Pranab

Sept. 05, 2016 nü New Delhi nung Tesayurtem Anogo amongdang Tir, Pranab Mukherjee-i Nagaland nungi Wt. Kedupe-u Wetsah nem National Award for Teachers-2015  agütsüba noksa nung angur.

New Delhi, September 05 (Agencies): Hombarnü tesayurtem anogomung nung Tir, Pranab Mukherjee-i Delhi nung aliba Dr Rajendra Prasad Sarvodaya Vidyalaya nung azünger class 11 & 12 kaketshir 80 nem lecture agüja liasü.
Delhi sorkari mepishiba ama taküm agi kümnabuba ‘Pranab Sir’s class’ nung jembidang Mukherjee-i kaketshirtem dang India nunger yimtenren putiotsü nung tesayuba agütsüba den külemi India linük aser alima nung kiralongraba tebilemtsü indang lemsatepa liasü.
Mukherjee ya yimtenren nung majemokdang college tesayur ka liasü. Pai history, political science aser law nung Masters’ degree ngua lir.
Tanep pai twitter ajanga, “Ajungmesoba tesayurtemji shisaliok tajung yangerba oset mesük. Ajungmesoba tesayur kati kaketshirtem nija nükjidongtemji lokti aser linük nükjidongtem den sentaktepdaktsür,” ta ashi.
Pranab-isa,  tesayurtemi shisaliok nung technology densema sayutsüla aser kaketshirtem dang, taremzüktep, tangatetba shisatsü, temeim aser taochi indang sayutsüla, ta ayongzük.
Tanü Ato kilonser, Narendra Modi-ia twitter ajanga, “Tepela Tesayurtem Anogo! Linük yangerba nung shilem agir tenendak tesayurtem ajak nem India-i tetushi agütsür,” ta metetdaktsü.