Tesayurtemi shisalok sentong tasenba indang jembi

Dimapur, August 29 (TYO): Tang ya linük nung tila tanurtem angazükba jenjang nungi tematiba jenjang tashi shisaliok sayuba maparen nung sentong tasen ka tenzüktsü asoshi Center government-i shimtetba Committee ka ajanga sentong tasen ka renemer agüja lir. Iba dangji National Educaton Policy (NEP) ta ajar. Iba sentong nung tashishitsü aika keta alinungji, Nagaland nunga state government-i anir tesayurtem aser shisashirtem rongnung iba sentong nung keta aliba onüktem indang shisalemsatep tenzüktsüla, ta tesayurtemi metetdaktsüogo.
Iba nüngdak ya tanü Brehostibar nü Dimapur Mission Higher Secondary School (DMHSS) nung tesayurtem rongnung National Education Policy (NEP) dak aketba onüktem indang shisalemsatepba mapang apiteta metetdaktsü. Tanü iba sentong nung shisalen teyurji Hindustan Bible College, Chennai nungi tesayur Prof. Dr.Lamech liasü. Pa ya All Nations Institute of Medical Sciences, Chennai nunga mendenbuba lir.
Pai iba sentong nung tesayurtem den shisalemsatep dang, tang linük nung shisaliok tasenba sentong yagi kaketshisatsü sayubaren nung temelenshi tulu bener arutsütsü saka item temelenshitemji kin tila purtem asoshibo tajung masütsüa akok, ta Dr.Lamech-i metetdaktsü. Tang yabo linük nung kaketshisatsü bushiba aser sayuba maparentem ya state nem tashi agüja lir saka tasenba sentong yagibo center nem tashi tuluba agütsütsü, anungji tebilemtsü adoktsü ta paisa ashi.
Dr.Lamech-isa linük nung tang amangba amato pei amangnütsü amangtsü aser kaketrejutem nunga yamaji benshitsü agüja aliba temeten aser ano teküpbok tia nung aliba kintem asoshi maongka balaka shiteta yutsüba inyakyimtem nung takoksa angutsüsa temelenshi arutsü shisabolua bilemer ta metetdaktsü. Item ajakji mapa küma meinyakdang, state shia nung government-i anir nübortem rongnung sensaksem tenzüktsüla aser tebilemba aser tangatetbatem center government dang ashitsüla, ta paisa ashi.