Tesayurtemi Tripura University VC longbanga ayu

Agartala, January 29 (Agencies): Tripura University nung tesayur 50 shi adenshia par vice-chancellor A K Ghosh, registrar O S Adhikari, dean aser University ketdangsürtem longbanga ayuba ajanga University department pezü nung professor aser associate professor shimtsü atema Honibarnü interview agitsü aliba athi.
Item mapa inyaktsü temsüa malirtem aser kinungertem interview agitsü asoshi VC-i shimtet, ta tesayurtemi aitsü.
“Tetemsü candidate aika indang application, VC tekolakba süa aliba ‘recruitment committee’ ajanga kuli kecha melii magizük. Taoba mapang nunga VC ajanga librarian, deputy librarian aser senotsü ketdangsürtem aika ozüng alema shim,” ta parnoki ashi.
“VC anentsü aser Ghosh inyakba mapang University nung mapa inyaktsü asoshi aniokba nung sendakba mapatem ajak bushisüngdang asütsü asoshi onoki akhanger,” ta tesayurtem rongnung züngsem kati ashi.
Tripura University indang rural development, education, microbiology aser molecular biology department nung professor aser associate professor shimba maparen bushisüngdangtsü asoshi, registrar O S Adhikari-i tesayurtem dang nangzük.
Iba shimba maparen nung bushisüngdang südaktsütsü asoshi VC-ia molunga agizügogo, ta Adhikari-isa ashi saka Ghosh-ibo osangbenertem den jembitsü memolung.