Tesayurtemji tanabuba tsürabur: P.B. Acharya

Dimapur, Sept. 04 (TYO): Tesayurtem anogomung osang sangokja Nagaland Angh P.B. Acharya-i, “Tesayurtem ya tanabuba tsürabur; Akhümket tulutiba mapaji Tesayur mapa lir,” ta ashi.

“Iba anogo nung asen tajungtiba rongnunga tajungtiba tesayurtem nem tenüngsang aser akhümtsübu agüja amunger. Parnoki asenok anepalua shisatsü tajung jenti agütsüba atema asenoki parnok nem tetushi agüjaka magütsümatsü. Parnoki asen dak nungi tenzüker asen tanurtem taküm nung temelenshi tajung agütsüba aser tarutsü linük yangertettsüba asoshi tanü parnok nem tetushi tila ka agütsütsü maongkaji tanü anogo ya lir,” ta pai ashi.

Acharya-isa ashiba agi, tanü ya tesayurtem rongnung-ia asen taküm nung temelenshi tuluba adokdaktsüba tesayur bilemtetba anogo ka lir. Pa/lai asenok ajungshia meranga züngdaktsübatem asenoki bilemteter. Tesayurtemi asenok tajung akümtsü asoshi tesayuba tajung jenti agütsü, alima angateta libalirotsü parnoki sayu aser asen tangatetba tendangtsü asoshi tasüngdangba asüngdanga liasü. Tanü asenok iba jenjang nung aliba ya parnoki yanglutsüba lir.

Tesayurtemi asenok nem shisatsü agütsüba ajanga asenok taküm nung sentsüwangshir, ta Angh-isa ashi.

Angh-i, “Asenok nisung shia dak temeja sempet kaka lir ta parnoki asenok nem amangdaktsü. Asen tsürabur o tetsü-tebuo-i tangar dang aria bilemtsü aser tebilemdang alitsü sayutsü merangba den densema tesayurtemia iba tsütsü asenok tali tashi itdaktsüogo. Aji dang masü parnoki tera dang azünga aliba mapang nunga asenoki asüngdangra kodang menungnangi shisatsü lemsatepa aruogo,” ta ashi.

Asenoki item tesayurtem bilemteta parnok matsüngdang apudaker, ta Angh-isa ashi.

“Kaket shisatsü ya pongdang ka süngdaktsüba masü saka mi jangrudaktsüba mesüka lir. Tanü tensa nung anogoshia tesayurtem ajak lanurtemi meketbanga lir aser parnoki tarutsü nükla nung item lanurtem yanglutsür. Ajisüaka tesayur kar ajanga dang miji jangrudaktsütsü. Tayongzükba tulu liaka tesayur aikati masetshii nungita yarir. Tanü asenok iba jenjang nung aliba ya, mapang ka nung kari inyakba ajanga lir. Iba yongji tanü asenoki item ama nisungtem aser tesayurtem nem akhüm tetushi agütsür,” ta Acharya-isa ashi.