Tesempa proker anema Congress-i anir opposition party tem longjemtsü

 

New Delhi, October 20 (Agencies): Tesempa proker Forces anema Ato kilonser Narendra Modi-i temerenshi magütsüteter ta aija tanü Congress Party-i, tangatetba kasa alir party tem longjemer tesempa prokertem anema noktaktsü asoshi Congress-i tanga opposition party tem ayongtsü, ta ashi.

“Item sentong tamajung tamakok ngudaktsütsü asoshi Congress-i democratic, secular aser progressive forces ajak ayongdentsü,” ta Congress party senior otongdar, Anand Sharma-i New Delhi nung osangbenertem dang ashi.

Sentong tamajung alirtem, tentettem aser Force tem-i alima matsüngdang India tenüng tajung menüktsüba anema mera takang ka agitsü nüngdak, ta Sharma-i ashi.

Sharma-isa, Congress-i Finance Minister Arun Jaitley-i agütsüba sangdong ajanga temelung masür, ta ashi.

Congress leniri, item ama forces anema temerenshi agütsütsü indangbo Jaitley-i kecha mejembi. Atangji nung, item ama tatalokbatem aser lenirtemi o mekümdangi jembiba atema “mera takang agiba mesüra temerenshi agütsüba kecha mali” ta ashi.

 Modi aitsüba dak sentakba nung Sharma-i,  pai kechisa inyakogo, iba nungji linük Temzüng nung pa teinyaktsü mapa meinyak ta ashi.

“Atangji nung Tir Pranab Mukherjee-i tebilemtsü akaba ajanga Ato kilonseri pa tangatetba jembitsüsa akum. Linük tekolakba-i (Tir) anaben tashi jembibaji asenok mejanga aliba nungi saaktsü atema tajaba ola ka südaktsütsüla,” ta Congress leniri ashi.

Dadri nung Muslim nunger ka tepsetba, Karnataka nung nüngtugu kaketzülur ka tepsetba aser linük nung tamangba lokti tsüngda mepetmesü adoka tesempatep adokba anema sangro zülur aser kaketzülurtemi lungkak aita award meyipa agütsüba mapang ka nung Congress-i tanga opposition party tem ayongsemer külemi noktaktsü telemtetba agiogo.