Tesempatsü aketba nisung ka masütsüla, parnokji samalanglang

– R.Imkong Lkr, 4th Mile, Diphupar.

Iba lima nung alirtem nisung taküm ya kanga tang senti taküm kaka lir, anungji iba senti takümji shinga nema mezüngmeshi mesüdaktsütsüla aser tesempatsü taküm kaka malitsüla.
Yangi tatishitsü kar yamai bener arur, iba lima nung asangurtem jenti lir, item rongnung teintet kar alir aser item jagi yimdak yimtsüng nung aser town balala nung nüburtem atema shilem tululu agir. Kodang asangur teintet ta südir, ibaji khen agi tebenjem mapang ka ka lir. “Robust part of a man” aser asangur teintet taküm kati par tsüraburtem den mapang talangka alitsübaji tensa mapang agi memelar, kechiaser parnok takümtem ya oda lia, liabo tambur akümer. Aser parnok külem medemsortem tubo joko aika kibong kümadoker tanur tajung ana asem tashi renloka aoer, aser tanurtem jagi telok balala nung shilem tajung agir, aser takok osang tajung bener arutsür. Yamaji tsürabur nem tenüngsang tetushi sempet bener arutsüdang apuani “kinungtsü aser kinungbo” tua ano tali kümkümshidaktsür aser tena kati ka nem tenüngsang agütsüteper. Aser kinungboi kinungtsü dang yamai ashir, ‘nütsü, oda na ajungba agi, nai timtem toushi ajak arema, kidang mapa olangla ajak inyakba den tanurtem junga sayubentsüba aser kaket shisatsü angazükdaktsüba den yimya awashi ajak junga sayutetba ajanga tanübo asen chiri takok osang tajung den sempet lep bener arutsübaji na ajungba ajanga lir ta ne nem tenüngsang tulu kü tsütsülen nung pelaba metetdaktsür.’ Idangji kinungtsü-i langzür, ‘au ni, ajia shidak tang, saka nübu, ni ne dang langka ka shidi, nai jungjunga angaa lidaktsüner. Oda tanurtemi takok osang tajung bener arutsüdang asen pelabaji dang masü saka tangar danga nüma tangteter ago. Aser nai kü nüng sanga ashiba ajakji tulubabo na nungi lir. Kechiyong nai ang ali rongsen kanga ochishia kü nem bener arutsür aser iba nungjagi tila la metsüksaa tanurtem mesür ago, iba den nai ni tangar kinungtsür ama kodanga senzüka medoktsür aser nai kü den teti mapa ajak nung yarisemba ajanga asen chiri takok sempetji bener arutsür, anungji ni ne tang kangasa pelar ako.’ Yamaji kibong nung pasasa “Automatically” temelenshibaji adoker alir.
Oda kibong lanutemi metettsüba miim o ka yamai shitsür, “an open secret” kodang pei kibong nung tanurtem tu tera Aiür aser Asangur kümtetdir, parnok ya tsüraburtem dang nungi tekolok, shisatsü nung tera tekaraba alir asünungji tsüraburtemi yimya tajung sayura, yangji tanurtemi ano mapa ajak nung tera tali tajungba nung renloka inyaka or alir. Idangji tsürabur kari yimya awashi tera ka meshidaki sayura, tatishitsü agi, yi ajemba, moko sali achiba, rarabangsenba, das asayaba (playing card) amala tanurtem kidang alidang parnoki itemji ngura, parnok dang ya anidaka inyakang ta mashiyongbo, tanurtemi joko item ajak tu lazükadoker alir aser yamaji anidaka inyakyonga aoba angur. Anungji Education subject nung yamai ashir, tanurtemi reprangzükba nungi noklang shilem nung 70% to 75% mapa küma inyaka aoer ta ashir. Anungji tsüraburtemi ibaji meteta pei sasa pei takümji tamasa melenshitsüla, idangji memeteti ka tanurtem tu tajung leni anir or alir ta metetdi arungma.
Iba mapang nung tu asangur teintet kar tubo par medemsor kibong lanutemi asaya menütsür aser joko ileni mesüra külenji reprang majung tejak tu metentetti akümer. Anungji asangur teintet tu agi tasü itta tang yamai bilemer aser pa mulung nung ashir, kü taküm ya yamai tangbo lisaa mindoktsü ta ser pai Aiür lanu kar dang yamai ashir, ni na meimer aser ana alitsü nai-a koda bilemer? Anungji aiürlai yamai bilema langzür, ni aiür lanu ka, kodaser yamala tambur kiyii aotsü! Ni pa sempar ta ashir. Yangi medemdangba “comparison” tasüngdangba ka amai bilemdanga shisadangtsü agütsür. Oda aiür taküm ka ya aonsotsü telang ka den medemdanga atishitepba angur. Yangi aiür taküm ka Bazar “market” nung aonsotsü telang ka den atishitepba medemdangba atema aiürtemi mejashitsü mepishir. Aiür taküm ka ya süngolio telang ishika bazari tayoktsü bener aruba mesüka lir. Yangi tantsür ka Bazari süngo-lio telang kar ayoktsü bener aruba indang tu khen bilemdangdi arungma? Tantsüla tu agi anepdang yakta süngo-lio agizükben telang kar, khu ka nung oshia bener bazar-i aoer, lai bazar tu tongli tang tesem ka bushia oagi bazar nung tu amener. Iba sülen lai aonsotsü telang kar bener aruba tu la khu nungi agiteta tarensena ayur, iba mapang nung tulur ka tantsüla anasai arur aser aonsotsü tu asüngdanger, ya kwi meshir? Idangji tantsülai jet ta dang iba-i telang ka nung senpak metsü ta ashir, aser tulur ka tu agi telang pezü alia bener oadok. Aser ano mena lia asangur ka arur aser telang ka nung kwi ta asüngdanger, idangji lai ashir senpak metsü saka asanguba tu agi telang ana agidi aser senpak semer agiang ta ashir. Saka lai ashir telang nungji senpak ka-ta majemtsü ta ashidang asanguba tu agi doktsür oadoker. Aser ano ka arua telang ka nung kwi ta asüngdanger, idangji lai ashir senpak metsü ta ashir, aser nisungba tu agi telang ana lai meshiba jenjang tu agütsür bener oadok. Aser iba sülentubo shingaia masüngdanger aser anü tu kanga sashia apuba agi süngolio tu azüla akümer aser tantsüla tua mena menabo laktetter aser nikongtsütsü arur ta mena alidang asangura masü aser tambura masü oda tetsüngda nisung ka tantsüla anasai arua angur, idangji nisungba tu agi masüngdangtangyongi lai ashir, hai tepu tajungsang, nabo yangi aonsotsü telang ana anünga lir aser nia joko kidangi meyipa oner ta-ji telang ka nung senpak pungo aser ana yong ya senpak ter agüjang ta ashir. Idangji nisungba tu agi tera menürema senpak ter-ji yangko “juli” nungi agiteta agütsür aser aonsotsü telang ana tu bener oadok. Shidakba agibo telang ana jenjang tu anepdang tsütsü asübo senpak lir Rs.40/- agi ayoktsüba liasü, saka la tang senpak lir “40” melen tu senpak semer Rs.30/- tashi ajemer, oda senpak ter dang kidangi bener aoba angur.
(Maneni asüng adok nung…)