Tesendaktep jungdaktsütsü atema Cuba semdangtsü renem: Obama

Washington, February 20 (Agencies): Cuba aser US linük na tsüngda tesendaktep tajungba kümdaktsütsü nükjidong nung Cuba taruba March ita semdangtsü sentong renemba osang ka US Tir, Barack Obama-i tanü, Honibar nü metetdaktsüogo.
“Kü kinüngtsü, Michelle Obama künati taruba March ita Cuba semdangtsü sentong renemogo. Tan Cuba semdangbaji küm 90 shi nung US Tir kati Cuba mezüngsüa semdanger alitsü,” ta pai metetdaktsü.
“Ni Cuba Tir, Raul Castro den ajurutepa ozü linük ana tsüngda tesendaktep tajungba küma yanglutsü onük benoktsü renema lir. Iba alizüng asangsang nung ajangzükba ajanga ozü linük ana tsüngda shishilembabaren jenjang tajungba akümtsü aser Cuba sensotemia tetsükdakba kecha majurui internet amshia pei shishilembabaren takok ngua inyaktettsü,” ta pai shisem.
Obama-i tan Cuba semdangdang Cuba linük nung democracy yimsüsütsü inyakyim benshitsü aser par sorkari nübur temeten anema inyakba onüka benoka jembitsü sentong renema lir.