Teshimtet GHSS 28 nung E-learning project tenzüktsü

Kohima, July 21 (TYO): Nagaland aser Assam Angh, P.B. Acharya aser Mumbai nungi melungtet telok, Indian National Fellowship Centre (INFC) nati achayanga Department of School Education, Government of Nagaland-i Rotary Club Mumbai (North) den senteper Nagaland nung tesehimtet Government Higher Secondary Schools 28 nung E-learning project tenzüktsü atema inyakdar.
NGOs aser Rotary Club, Mumbai (North) teyari ajanga iba project nükjidong ya sorkar school tem nung shisaliok tashi itdaktsütsü atema lir.
Mumba nung headquarter amenoka aliba Multi-national Pharmaceutical and Biotechnology Company, Wockhardt Foundation nung General Manager, Dr. Tausif Jalal-i tongti tenlar asütsü. Pai anogo asemnü (July 13-15) Kohima semdangba mapang Raj Bhavan nung state Angh densema Education Department ketdangsertem den o lemtepa liasü.
Paisa Kohima district telongtet nung teshimtet school pezü semdang aser iba mapang pai school ketdangsertem den E-learning programme benoktsü atema o lemtepa liasü.
Sorkar aser NGOs-ia temepishiba nung ajemdaker ano temsüa aliba sorkar school aika nung  E-Learning Scheme tenzüktsü melungogo.
School tem nung E-learning ajanga angazüktsü maongka jenti ngua tan putu nung nüngdakba shisaliok angutsü.
Ano temsüa dang lira state nung school aika nung E-learning tenzüktsü atema Wockhardt Foundation-i melungogo. Parnoki taküm kümsa teshimtet school tem nung E-learning tenzüktsü sentong lir.
NorthEast  state 8 rongnung Nagaland nung aliba sorkar school tem nung mezüng E-Learning tenzüktsüa akok.