Tesla-i ‘Model 3’ electric gari India nung sayaogo

Bengaluru, April 1 (Agencies) : Silicon Valley, Bengaluru nung amena aliba gari yanglur telok, Tesla Motors-i India nung parnok indang sen dollar 35,000 alang, Model 3 electric gari atema jilia mangaba sentong tenzükogo.
Iba gari ya 2017 küm tatemlen nungi yanglu tenzüktsü aser North America nung tama ayok tenzüktsü.
Tesla Motor nung CEO aser Billionaire Elon Musk-i, “Model 3 jilia mangatsü atema taonung linük aika enoksemogo. Iba osang tejangja reprangdangang. Item rongnung India, Brazil, SA, SK, NZ, Sing (Singapore) aser Ireland linüktem dena lir,” ta twitter ajanga metetdaktsüogo.
Company indang blog post ajanga, Tesla-i, iba gari mangartem nem tesem sasep lemsar tongtsütsü, kechiba süra tesem aser linük shia nung production nung temelenshitsü terara adoktsü. Model 3 gari ya tachiji len mener anitsüsa yanglur India aser UK linüktem nunga ayoktsü, ta shia lir.
Tesla-i India den tan mezüng inyaktsü atonger masü saka tarutsü mapang linük nung Gigafactory (a massive lithium-ion battery manufacturing plant) ka lapoktsü, ta Musk-i yaküm twitter ajang metetdaktsüogo.
Pai tawa linük Ato Kilonser Narendra Modi den Silicon Valley nung ajurutepa item ken o jembiogo.
India nung mokozü ajema adokba ajanga mopung memenenba electric garitem tang kanga nüngdaka lir. Delhi aser Karnataka sorkar nati electric garitem dang tax memeshitsü laletogo aser ibaji ajanga nüburtemi item gari kecha tetsükdaktsü makai alia amshitetsü lenmang lapoktsür. Ano ‘National Electric Mobility Mission plan’ inyakyim kübok linük sorkari electric garitem nem subsidy agütsütsü sentong lir.
Tesla ya alima nung electric gari yangluba company rongnung tajungtiba lir. Parnoki sen dollar 80,000 alang Model S tarensen nung Mercedes-Benz, Audi aser BMW garitem yanglua lir. Model 3 ya parnoki yangluba gari rongnung sen talangtiba lir koba BMW 3-Series, Audi A4 aser Mercedes-Benz C-Class garitem den meneptepa lir.
Iba gari India nung sayaba osang angashia India nung technology company tem nung lenirtem kanga jangradaktsür.
Paytm company ngutetsang aser CEO Vijay Shekhar Sharma-i twitter nung Musk-i metetdaktsüba tanaben lemsatep aser GOQii company ngutetsang Vishal Gondal-i, “Nia iba gari sentsü temerem ka kong aser kodangsa jilia mangatettsü?” ta Musk dang twitter ajanga asüngdangogo.