Test Team Rankings nung SA tanabuba jenjang tongtetogo

Aenjeti/January 14, 2019 (Agencies): Pakistan den Test asaya 3-0 agi akokba sülen South Africa team-i New Zealand aser England ajateta ICC Test Team Rankings nung tanabuba jenjang tongtetogo.
Iba asayamung akokba sülen parnoki point pezü ngua point ajak agi 110 aküm aser ICC Test Team Rankings nung England point ana agi ajateta India (point 116) sülen tanabuba jenjang tongtetogo. Kasa mapang nung Pakistan team Sri Lanka sülen jenjang ka agi tajemba küma 7buba nung lir. Iba asayamung metenzük tsüngda parnok point 92 liasü saka tang point 88 dang kümogo aser Sri Lanka dang nungi point asem agi tajemba lir.
Maneni New Zealand (point 107) pur England dang nungi point ka agi tajemba lir. England team New Zealand jakdang linüra January 23 nü nungi tenzüka Windies den asayatsü aliba asayamung akoktsü nüngdaker.
Hombarnü Pakistan den Test tasembuba asaya nung Duanne Olivier-i wicket tongtibangtem out süja parnoki iba asaya anogo pezübuba nung run 107 agi kokogo. Tanabuba inning nung asaya akoktsü atema wicket 7 anunga aliba den run 228 nüngdaka Pakistan team batting asü tenzük, ajisüaka Olivier-i Babar Azam (21) aser captain Sarfraz Ahmed (0) out sütsüba ajanga parnok asaya chirep.
South Africa nungi asayar Quinton de Kock, shibai tanabuba inning nung run 129 yanglu, pa nem man of the match award agütsü.