Tesüba Israel Tir, Shimon Peres arishi küm 93 tain lia süogo

Jerusalem, September 28 (Agencies): Tesüiba Israel Tir aser yimsüsür mongin, Shimon Peres asüba osang ka par jabaso, Chemi aser tanük, Rafi Walden nati tanü, Bodbar nü metetdaktsüogo.

Taoba hopta ana tsüngda nung stroke timtem anaben tashi ajuruba sülen arishi küm 93 Peres Tel Hashomer mozükidang taneptsü bushia amongdang asüba osang ka parnoki ashi.

1994 küm Nobel Peace Prize agizüksang, asür Peres-i Israel’er yimtenren sabang nung küm 70 tashi tongti shilem agi aser pa ya Middel East ajunga nung yimji yimjung lidaktsütsü asoshi taküm bendanga agüja inyaker yimsüsür ka liasü.

Pa asüba osang angazükba sülen alima lenirtemi sasaba olen lemsatepba den külemi, pai taküm bendanga agüja inyakba atema tenüngsang agütsüogo.

“Alima tesangwa ka remsepogo. Meimchir jenjang melenshitsütetsüsa inyaker nisung rong nung asür Peres densemogo. Peres asüba osang angazükba sülen temulung kanga shiranger,” ta Peres asüba osang angazükba sülen US Tir, Barack Obama-i sangoktsü.

“Asür Peres mangdang tajung ayur yimsüsür ka liasü aser pa asüba atema sasa bilemer. Küna tsüngda ken o aika nung bangjema liasü aser ken o jenti nung mangatettepa adoka aru saka ibaji democracy yimsüsütsü yimya ka liasü,” ta 1996 election nung Labour Party yimtenren telok lenisang menden abensang, Peres madak takok ngua, Israel Ato Kilonser tasenba akümsang aser tang Israel Ato Kilonser menden abensang, Benjamin Netanyahu-ia temulung shiranga ashi.

“Peres alima ajungai temaba jenjang nung ajungketa ayur yimsüsür ka liasü aser alima lenirtemi pa nungi angazüktsü merangba kuli jenti lir,” ta pai shisem.

Peres asüba osang angazükba sülen Netanyahu-i ayonger külen par cabinet senden nung shilem agir yimsüsürtemi minute ka ola madoki mena asür Peres nem aküm agütsüba osanga angazükogo.

“Peres-i tatem tashi yimji yimjung lidaktsütsü asoshi inyakogo,” ta tenüngsang agüja, Palestine Tir, Mahmoud Abbas-ia sasaba aser temulung shiranga bilemba olen ka Peres’er kibong den shiti ka ajanga lemsatep.

Ajisüaka, Jerusalem kübok Mount Herzl cemetery nung tan Hokolbar nü agitsü renemba Peres den asü pila sentong nung shilem agitsü mesüra magitsü osangbo pai memetetdaktsü.

Ano külen, “Ozüng alema inyaksang, Peres iba lima nungi pila aoba ajanga Palestine nüburtem pelateper. Peres-i taküm alidang ozüPalestine nüburtem indang azü toktshitsüren nung ozüng alema tongti shilem agia liasü,” ta Gaza madak yimsü asür, Hamas telok otongdar,  Sami Abu Zuhri-i sangoktsü.

Peres den agitsü renemba asü pila sentong nung shilem agitsü renemba osang Obama; Britain’er chubachir, Prince Charles; taoba US Tir, Bill Clinton aser France Tir, Francois Hollande nungeri jangjashitsüogo.

Peres-i mezüngsüa Israel parliament yimsüsür 1959 küm akümba sülen 2007 küm Israel Tir menden abentsü jenjang ngua liasü.