Tesüiba küm pongu nung J&K nung kiralongrar 800 tepsetogo

New Delhi, July 03 (Agencies): Tesüiba küm pongu tsüngda Jammu & Kashmir nung security sepaitemi kiralongrar 800 shi tepsetogo, ta Bodhbarnü Central sorkari Lok Sabha nung metetdaktsü.
Lok Sabha nung BJP MP, Nitesh Ganga Deb-i asüngdangba langzüdang Minister of state for defence, Shripad Naik-i, “Security sepaitemi LoC nung kiralongrartem aser ozüng alema arrtsü adena aitertem khaseter. Iba dak alia kiralongra anema operations aser kiralongrartem den raraba mapang nung khaseter,” ta metetdaktsü.
Küm balala nung kiralongrartem khasetba züngdangba tejangja metetdakja minister-i, 2014 küm kiralongrar 104 khaset, 2015 küm kiralongrar 97, 2016 küm 140, 2017 küm 210 aser 2018 küm 249 khasetogo, ta metetdaktsü.
“Security sepaitemi tanen makai operations aoba ajanga kiralongrartem aika tepsetogo,” ta paisa shisem.
Taküm-a mezüngbuba ita trok nung sepaitemi kiralongrar 100 dak tema khasetogo.
Tawa Rajya Sabha nunga telangzüba ka langzüdang Defence Minister Rajnath Singh-i, taoba ita trok nung Pakistan-i Line of Control (LoC) nung ceasefire ozüng alema 1,248 ben inyakogo, ta metetdakja liasü.
Ceasefire ozüng alema inyakba osang tejangja metetdakja Minister-i January ita nung Pakistan-i ceasefire alema 203 ben inyak, February nung 215 ben, March ita nung 267 ben, April ita nung 234 ben, May ita nung 221 ben aser June ita nung 108 ben ceasefire alema inyakogo, ta metetdaktsü.