Tesüiba mapang Mohan Bagan goalie Shibaji süogo

Kolkata, February 20 (Agencies) : Ajaki meteta alisang, tesüiba mapang Mohun Bagan telok nungi goalkeeper Shibaji Banejee Deobar aonung temulungjang tashitak agi süogo. Pai penalty kanga junga nokdangtetba agi kanga nüngtugu aküm.
Arishi küm 68, Banerjee-i pa kinungtsü aser jabaso anünga yutsür iba lima nungi pila.
“Tesüiba mapang football asayar, goalkeeper Shibaji Banerjee asüba osang angashia temulung shiranger. Ni asür kibong aser tembartem den asükhu lemsateper. Asenok dang nungi asayar tajung ka pilaogo,” ta West Bengal Chief Minister Mamata Banerjee-i tweet asü.
Banerjee ya Mohun Bagan atema nisung asem agi akümba technical committee nung lia iba lima nung pila.
Bagan nungi otsüsütsüsa asayasang, Banerjee-i club nungi asayaba mapang marok 34 tashi agizükogo. Pa asayaba mapang 1977 nungi 1981 tashi East Bengal teloki parnok nem goal ka tanga magütsütet.
Banerjee-i free kick tem kanga junga nokdangtetba ajanga Kolkata nung football sapurtemi pa kanga sapua nüngtugu aküm.
Mapang aika nung penalty metsüteptsü mapang coach temi pasa yok aser pai aiben takok ngutsü.
Banerjee-i 1977 küm Eden Gardens nung Brazil nungi nüngtugu football asayar, Pele-i aniba telok, Cosmos den kanga junga asayatetba ajanga nüburtemi pa mamateter. Ano 1978 IFA asayamung nunga tesüiba mapang USSR ta jaa aliba linük nungi Ararat Yerevan aser Mohan Bagan nati takok marok anguba (joint-winners) nunga pa dena liasü.