Tesüiba Pakistan PM, Gilani’er jabaso kümzüka anitetogo

Islamabad, May 10 (Agencies): Teloktep US aser Afghan mitkartemi tesüiba Pakistan Ato Kilonser, Yusuf Raza Gilani’er jabaso, Ali Haider Gilani Afghanistan nungi tanü, Mongolbar nü kümzüka anitetogo.
Al Qaeda telok den sentaktepba telungpurtemi Pakistan anülulentip tsütsülen Multann yimti nungi Ali tashiyim agi 2013 küm pua anir ao aser iba anogo nungi tenzüka küm 3 tashi pa pua ayudak memeteti liasü.
Teloktep mitkartemi Paktika province kübok Giyan district nung kiralongrar mita aoba sülen parnoki Ali-ji kümzüka anitet ta Kabul nung tenzükba US mitkar lenirtemi metetdaktsü.
“Tanü kiralongrar mita aodang parnok 4 tashi injang agi kaset saka ozü mitkartembo nisung ka danga meyiru,” ta parnoki ashi.
“Ali taküm kümzüka anitetba osangji shitak lir,” ta shia, Afghan National Security Advisor, Hanif Atmaar-ia Ali taküm kümzüka anitetba osangji jangjashitsüogo.
“Ali Giyan district nungi kümzüka anitetba sülen pa par Pakistan-i anir aotsü asoshi maparen tenzükogo,” ta pai shisem.
“Ali taküm kümzüka anitetba osangji tebu, Gilani dang metetdaktsüogo aser pai pelaseta par jabaso den tanaben ajuruteptsü yongyatsü tenzükogo,” ta Kabul’er Pakistan ambassador, Hazrat Omer Zakhilwal-ia metetdaktsü.
Pakistan-i miima Taliban telok nungita yariba ken o ajemdaker kidangsüa aliba Pakistan aser Afghanistan na tsüngda tesendaktep mejungi akümba mapang ka nung teloktep mitkartemi Ali taküm kümzüka aniteter lir.
Gilani-i 2008 küm March ita nungi tenzüka 2012 küm April ita tashi Pakistan Ato Kilonser menden aben.