Tesüiba Portugal Tir Mario Soares süogo

Lisbon, January 08 (Agencies) : Tesüiba mapang Portugal Tir Mario Soares arishi küm 92 nung süogo. Pa Lisbon nung aliba mozüki kati anir orr hopta tanabuba nung iba lima nungi pila.
December 13, 2016 nü nungi pa Red Cross hospital, Lisbon nung tango junga mesashiteti coma nung lia January 07, 2017 nü (Honibarnü) asü, ta Xinhua news agency osang ajanga metetdaktsü.
Apirl 25, 1974 nü azü metongshii Portugal nung Soares-i democracy bener aru ta ajaki kanga jangja meteta lir. Iba mapang Oliveira Salazar yimsüsüba atsüngtok.
Pai 1986 nungi 1996 tashi Tir ka ama inyak aser 1976 nungi 1978 aser 1983 nungi 1985 tashi Ato Kilonser inyak.
Paisa ano European Parliament nung foreign minister aser MP mapaa inyak. Pa foreign minister ama inyakdang Portugal-a European Union (EU) nung züngsema aküm aser tang tashi iba jenjang nung lir.
Soares ya December 07, 1924 nung aso aser Lison University nungi law renema zünger lawyer aküm. Pa ya tang Ato Kilonser Antonio Costa tekolak sür aliba Socialist Party nguteter rongnung ka aser mezüng lenir liasü.
Ato Kilonser Antonio Costa-i Sores asüba sülen linük nung Hombarnü nungi tenzüka anogo asemnü mang yima amungtsü metetdaktsüogo.
“Tanü asenok dang nungi asen nüjiso bener arutsüsang pilaogo. Mario Soares-i akümli piyong nüjiso atema nokdak,” ta Costa-i ashi.
Mario Soares ya shingaia memelentettsü. Onoki pai inyaktetbatem kodanga mamai teti pelatsü,” ta pai shisem.
Mongulbarnü Lisbon nung Soares den asüpila sentong akatsü. Costa ya tang official nüngdak kar asoshi India nung arua lir anungji pa iba asüpila sentong nungji medentettsü ajisüaka pai asür Soares’er kinungertem den asükhu lemsatepogo.