Tesüiba sorkartemi NE senzüka yutsü: PM Modi

New Delhi, December 6, 2024 (Agencies): Tesüiba sorkartemi votes den terenlok medemdanga inyak aser iba jagi northeast asoshi temulung magütsü ta Prime Minister Narendra Modi-i tanü ashi.

Northeast nung nütsüng yongsük aser votes ajema aliba agi tesüiba sorkartemi temulung magütsü, ta pai ashi.

Northeast nem tetushi agüja Ashtalakshmi Mahotsav lapoktsüdang “Atal Bihari Vajpayee sorkari northeast atema mezüng ministry balaka tentettsü aser ministry shiai northeast atema 20% lemzüktsür”ta PM Modi-i ashi.

“Tesüiba küm 10 tsüngda asenoki northeast kanga renlokba nguogo saka iba ya inyaktsü tasak liasü. Onoki India renlokba nung northeastern state tem sendakteptsü atema akokba tashi meratem agiogo” ta pai ashi.

“Mapang talangka asenooki votes repranga terenlok mapa inyakba nguogo. Northeastern state tem nung votes tajemba aser menden ishika dang liasü, anungji tesüiba sorkartemi northeast renlokdaktsütsü atema temulung magütsü” ta PM Modi-isa ashi.

“Tarutsü anogotem Eastern India aser Northeast kanga renloka aotsü. Mumbai, Hyderabad, Chennai aser Bengaluru ama Guwahati, Shillong, Imphal, Itanagar aser Aizawl yimtitem akümtsü” ta paisa ashi.

Northeast nung sobaliba takar aser nisung teyakyak aliba ajanga India renlokba nung teyari kanga angutsü. Tesüiba küm ter tsüngda ozü sorkari Delhi aser northeast den ‘Dil’ ongdang tangatetba agientsü meranga aruogo ta Modi-isa metetdaktsü.

Tesüiba küm 10 tsüngda Union minister temi northeast 700 ben semdangogo aser ozü sorkari iba tesem sendakteper, ta paisa shisem.

Mezüngbuba Ashtalakshmi Mahotsav ya December 6 nungi 8 tashi Bharat Mandapam nung amonger.

Iba benjung ya northeastern state 8- Assam, Arunachal Pradesh, Meghalaya, Manipur, Nagaland, Mizoram, Tripura, aser Sikkim tobur ajungba aser nisung temeyoktep aliba sayur. State 8 ya senteper ‘Ashtalakshmi’ ta ajar.