Tesüneptsüri Süngjemdaktsür (Efesa 4:17-32)

“Aser Tsüngrem Tanela Temeshi, shiba dak tekümzüktsüba anogo asoshi nenok temaitsü ajen pa tejashidaktsü.” (Ef. 4:30).
Tebu Tsüngremi Tesüneptsür Tanela Temeshi asenok teti alitsü yok. Pa asenok dak alir. Pa asenok taküm sünepba lidaktsütsübaji asenok mapa lir. Tasen Lai-i aji koda inyaktsü asenok dang sayur.
Tanela Temeshiji Temeshiba Tanela (Rom 1:4). Asenok Tsüngrem tenla kitem lir, kong Pa alir (1 Kor. 3:16,17). Pai telung ochiba aginer (T. Ken 51:6). Pa alidak temerük alitsübaji yimya. Ibaji menenba jagi Pa jashidaktsür. Paji Tamang Tanela (2 Kor. 4:13; Rom 15:13). Tamang meteni Tsüngrem peladaktsütsü makok (Ibri 11:6). Kodang asenoki Pa O nung amangdir aser Pa tenangzükbatem nung metaloka lidir, Tanela Temeshi pelar .
Paji Temeim Tanela (Ef. 4:2,3,26-32; Gal 5:22; Rom 5:5; 15:30). Pai asenok rongnung temeim sayur aser Pa temeimi kin ajak alentepdaktsür. Asenoki meimtepra iba jagi Pa peladaktsür.
Paji Temeshiba Tanela lir (Rom 8:26,27). Asenoki koda sarasademtsü memetet nung Pai asenok dang sarasademtsü sayur, yarir. Kodang asenoki aseni mulungba intoker Pai mulungba ataa lidir, Pa pelar. Pai asen mulungjang nung sarasademtsü khuret agütsüba atema asenoki pelatsüla. Paji Tesayuba Tanela (1 Kor. 2:10-14). Tsüngremer lemangtem aser Pa miim mapa angatettsü asoshi tashi temetetter professor ka ama Laishiba nungi bushi dang nungibo, tila tanur ka ama asenoki Tanela Temeshi teyari bushitsüla. Iba yagi Pa peladaktsür.
Paji Ochi Tanela lir (Yn. 16:13). Laishibaji dang ochi jembiba kaket ka lir, ajakji ochi. Tanela Temeshiji Tezülusang (2 Peter 1:20,21). Asenoki Laishiba nem menden agütsütsüla aser Tanela Temeshi teyari ajanga aji meyiptsüla. Paji Shisatsü Tanela lir (Isa. 11:2; 1 Kor. 12:8). Kodang asenoki aseni metetba nung masü saka Pa shisatsü nung metalokdir, Pa pelar.
O Taküm Tsüngrem Tanela. Na tesangwa aser mi, Ano ken arogo dangi alung, aser iba shidakba Ne meyong kümjang; Ibai temeim aser tepela aser ain agi temeshiba aser yimjung agi süngjang. Khrista meimchir temulungjang nung mamong tashi aser temenen aser tejashi manen tashi! (Henry H Tweedy)