Tesüngjem Aonung Ka

– P Tiamongba Aier

Temeshi, Tesüngjem, Sentsüprang aonung ka….. Süngjema mejanger, Süngjema mejanger…” ta  asenoki Khristmas mapang ken atener. Atangji, asen Kümtetdakba Yisu Khrista asoba aonungji yamaji sür alitsü südi aser ken mejemeria yamaji bilema iba temenungratsü ken tajung ya mejem asütsü akok. Asenoki temesüng nisungtem dang nungi Khristan yimsü agizüka amangtsü tenzükba sülen nungi Yisu asoba benjung ya kanga metsüngareta mungyonga arur aser arogo ajak nung sentong tajungtem yanglua benjungteper aser kinü Yisu külemer. Ajisüaka, tanü Naga loktiliba nung Khristmas amungba reprangdang nung, nisung aikati Yisu asoba benjung ta asüba tu amadoker mungteper ama ajiteter. Tanü asenok Naga nunger aikati Khristmas ya tanela nung masü saka shi jangraba nung dang amunger aser asenoki meinyakdangi mesüra mebenshidangi aruba sobalitem tamajungtem ajizüka benshir. Sobaliba mesüra inyakyim tamajungtem ta süra, temesepba achi-ajemtsü agi leter longsolongbenba, sentepi moi tanga sentongtem nungang mapang endokba, aser tongtipangbaji tapoktsütem (firecrackers) amshiba lir. Item sobaliba ya asen Khristan yimsü den khenyongi meputep aser Laishiba tetuyubatem anema lir. Kechiyong Laishiba ajanga asenok dang temesepba chiyungtsü machitsü tuyur, Tsüngrem külemtsü tuyur aser süngyanglutem mekülemtsü aser parnok jilu mebenshitsü aser shi jangraba mapatem meinyaktsü tuyur. Saka tanü asenoki jungjunga shidadangra, Naga nunger aikati Lai O tetuyubatem tashi mangar aser alima nem kokdaktsür asen taküm alir. Nagaland kübok tangalen koma amung’ar memetet saka Dimapur nung küm ishika Khristmas mungyunga aruba meyipa reprangdangra, “Temeshi, Tesüngjem, Sentsüprang aonung ka….. Süngjema mejanger, Süngjema mejanger…” ken den khenyongi meputepi mungogo. Tesem kati ao nung tapoktsütem apoker, ano külenia odang nung kasa dang tapoktsütem apokba ola angashir ta tamangertemi Khristmas mungtepa nguogo. Iba sobaliba ya shinga dang nungia masü saka tzümartem, talisa süngyanglu külemer dang nungi ajizükba benshiba inyakyim ka lir. Hao, tapoktsü (firecracker) ta ajaba ya mezüng China nung yanglua amshi ta bushiteta lir, saka India nung Hindu nungertem indang tesangwa benjung- Diwali, Deepavali mesüra Dipavali nung iba ya kanga bulua amshir aser asenoka parnok dang nungi ajizüka benshir. Puti otsü bushirtemi Diwali amungba kuli balala nguteta lir saka Hindu nungertemi Diwali ya par tsüngremtem Rama, Sita, Lakshmana aser Hanuman nunger Ayodhya atongba anogo lir ta züngshir. Rama’er sepaitemi Ravana chuba’er sepaitem madak takok anguba aser Rama-i Ravana tepsetba anogo ta amanga Hindu nungertemi Diwali benjung amunger aser iba mapang parnok tapoktsütem poktepba benjungteper. Iba jilu ajizüka tanü Naga nunger Khristan aikati Khristmas amunger aser “Tesüngjem aonung Yisu aso” ta asüba tiyazü kümdaktsür. Amajok nung sen endokba dang masü saka tapoktsütem apokba ajanga temeket alir nem timtem agütsür, mopung menentsür aser shirang tamajung adokdaktsür. Anungji, Naga nungertemi iba sobaliba/inyakyim ya mebenshitsüla. Asenoki iba sobaliba ya asen loktiliba nung tera meyangdaktsütsüla. Khristmas mapang asenoki tapoktsütem alia pokdokba dang nungibo kiyong nung mesüra temeket nung makamaiter nem ang shi khen alia chiang ta ser sen agütsüdi, tapoktsütem alitsü melenabo nüngdakbapur ang kar yaridi, tapoktsütem alitsü melena Yisu asoba tepela nung arogo nem ang tenla agütsüdi, tapoktsütem alitsü melena mamanger kar dang ang Yisu asoba tenüng nung ya agiang ta ser sempet agütsüdi. Atangji, iba sobaliba ya kanga majung aser asen loktiliba den meputep, anungji yaküm tashi koma angateta mungogo ojang, saka taküm nungibo sobaliba tamajungtem mebenshitsü merangdi aser talisa arogotemi anir lokti tenttetemia peii akokba tesayubatem aser tenokdangbatem agütsü nung kanga ajungtsü. Yamaji asü nung dang “Temeshi, Tesüngjem, Sentsüprang aonung ka… Yisu aso” ken nung atenba ama asenoki chichiba Khristmas angateta amungtsü.