Tesüngmangtsü temeshi Laishiba

~ Courtesy: Otongdar

“Kechiyong shin O kechasüdanga nisungi mulungba agi maru; saka nisungtemi Tanela Temeshi agi ajungshia Tsüngrem nungi jembi.”

Tsüngrem dak amangertem asoshi Laishiba ya tasembuba sempet.
Mezüngbubaji Yisu Khrista aser Tanela Temeshi. Laishiba indang kodang kanga aroka shisadangdir ibai tanga kaket ka ama masü, saka Tesüngmangtsü Tsüngrem O meimchir nem apuoktsüba, koba kenyongi balaka aser Temeshi. Kechiaser, mezüngbuba nung, ibai Tsüngremi apuoktsüba O. (2.Tim.3:16) aser tasembuba nung iba yagi, tang aser tatem maka Tsüngremer sentong aser nükjidong meimchir alangzükba indang sayur.
Kechiba Temeshi Laishiba ya tesüngmangtsü?
Temeshi Laishiba ya alima nung tejentiba aser tajungtiba kaket.
Temeshi Laishiba ya alima nung timbiba oshi nung meyipzüka amshir, aser timtiba ayokba kaket.
Temeshi Laishiba ya alima nung ajaki kanga sapua, kecha tesadang meli-i tanur-tain ajaki azünger.
Temeshi Laishiba ya nisung balala 40 shi-i zülu. Ibai putu 1600 shia agia mapang aser tesem balala nung zülu.
Oren amshibaren tesüngmangtsüka (Wonder of language), kechiaser nisung timbaka tazüngba malir (uneducated)-temi zülu. Saka Temeshi Laishiba ya züluba rongnung kaket tajungtiba ta züngshir.
Wazüka ayuba tesüngmangtsü (Wonder of preservation). Putu ajak nung nisung aikati sembaba kaket rongnung ka. Aiben chubatem aser sorkartemi arungtsü aser samatsütsü bushi. Saka tanü tashi tamanger asoshi wazüka kibong shia nung angur.
Temeshi Laishiba ya nisungi Tanela Temeshi agi zülu: Aser ya, Tsüngrem yimya, nükjidong aser tashi jungkai adoktsüba (God authoritative revelation).
Tsüngrem indang meimchir shisatsü angutsü atema Laishibaji Tanela tzüpokdak (Source) lir. Iba ya Kodaker oshii indang Textbook lir, aser teti taküm atema lenisüba kaket lir.
Temeshi Laishiba ya mapang Laishiba ya mapang balala nung nisung balalai zülu, saka onük kecha nunga meputep madoki liromedema züluba ya tesüngmangtsüka.
Temeshi Laishiba ya khenyongi tanga kaket dang nungi balaka, kechiaser zülua aliba yimya ajanga iba ya Kodaker shisatsü anguba tajungtiba kuliji lir.
Temeshi Laishiba koba dang Tsüngrem O ta ajar iba ya kanga tesüngmangtsü, keshiaser iba yagi temeshiba Laishiba koba dang Tsüngrem O ta ajar iba ya kanga tesüngmangtsü, keshiaser iba yagi temeshiba aser Tsüngrem dangi aniba dang masü, saka alima nung meimchir ajak asoshi leniba kaket lir. Kodang asenoki ibai züngdir Tsüngremi asenok den jembir, aser kija, lokti libaliro, taküm yimya, yimsüsüba nung aser tamangba ajak nung Laishiba ajanga lenmang sayur aser anir. Iba tesüngmangtsü O agi asenok aniangma.
“Ne O kü tsüng asoshi milen, aser kü lenmang asoshi tesangwa lir”.