Tesüsaba Star Wars film Critics’ Choice Awards atema benoktsü akok

Los Angeles, December 21 (Agencies): Film-tem benoktsü mapang süiaka, tesüsaba Star Wars film, ‘Star Wars: The Force Awakens’ Critics’ Choice Awards atema benoktsü akok ta The Wrap-i metetdaktsüogo.

Meimlai aliba mapang ka nung, “‘Stars Wars: The Force Awakens’ film sempet agütsütsü film tarensen nung densemra, iba film nem vote agütsütsü asü magütsütsü,” ta The Broadcast Film Critics Association (BFCA)-i par züngsemtem den tasüngdangba benokba osang angazükogo.

Tan osang angazüka ama, 7 buba Star Wars film ya sempet agütsütsü asoshi benokba film tarensen nung benokra, iba film ya Best Picture film shilem nung densemdaktsütsü renema lir.

“Küm piyong film tajungtem yangluba pela agizüker ta sayutsü nükjidong nung Critics’ Choice Award sempet ya agütsür. Iba tongti sempet agütsütsü sentong nung ‘Star Wars: The Force Awakens’ film-a densemtsü temsüa aliba onük nisung aikati benoktsü tenzükogo,” ta BFCA-i metetdaktsü.

Critics’ Choice Awards sentong ya sangküm 2016 January ita 17 nü agitsü ayonga lir.