Tetendangdaka maka !

Tasütsüba wara Coronavirus agi asen lima tonga arur ta arsangoktsüba agi ajak tsübuteper aser tulu tila ajak kanga kümdanga alitsü tenzükogo. Pi tashitemetet lima China, Europe aser America limatem nung dena iba tashidak wara ya menokdangteti tsübutepba angashir aser asüama atalokba angur. Aji oda, India nunga asen kidanger Assam state tashi nung iba tashidak agi shiranger putetba osang angashir. Tekümdangtsü kaji, iba tashidak yagi nisung ka dak tongra, pai mesüra lai kongshiba oset aser tesem ajak nung iba Corona mesen ya yutsür, anungji iba mesentemji mesüi metema lia nisung kati danga kasa tesem nungji kongshira iba tashidakji menar ta yamaji menatepa aoer. Atangji, iba tashidak mesen alirtem aketdang aser hajidang adokba metsü aser tango ajangaa iba tashidak menar. Iba amaji ka asünungbo, Nagaland nunga asenok aika dak iba mesen ya menaloker alitsüa akok. Osang tajung kaji, Nagaland nung tang tashi nungbo shinga daka iba tashidak mesen aliba ya puteta mali aser shirangba osanga mangashi, anungji tang amai tashidak agi matongdang, jelia nokdangtsü merangba ya kanga shisataka mapa lir. Ajisüaka, shinga dak tashidak meputetbaji tashidak mesen shinga daka maliba agi masü saka tashidak mesen ali asü maliar tendangdak makaba agi asütsü akok. Ibai akhi putu nung amato tebok aser teku amdanger tebilemba kisüng agi temesen aser tepokbok mozü agütsüba putu masü, mesüra tekolak aser teben nung amdanger ‘pain killer’ agütsüba putua masü. Tashidak tulubo masütsüa akok, anungji mozü aliba dang nungibo temang tendangba nung sen teimba endoka tashidak shitak puteta mozü shitak chidaktsütsü merangba putu lir. Iba ama mapang ka nung, state kümer küm 60 nunga tanü ama tasüba wara tamajung agi asenok amokmerendang, government mozü kidang angati tendanga anepalutsü melen, asenok temang nung tashidak tendangdaka maka alitsüba ya tashidak wara atema shisaboluba dang nungi shisatebuluba kümogo. Iba shisabolu ya tanga agi masü saka küm papikato election mashimashi agili, election temer pei inyaknütsü inyakli ta tarutsü asoshibo asenok shiangaia mebilemi aruba taa to tanü asenoki angur. Ashi, election jungjunga agili, election temer mozü ki tajung tajung yangluli aser kaketreju tajung tajung lapokli ta aru asübo, tang ya Eastern, Western, Nothern, Southern aser Central Nagaland ajak nung tashidak tendangdak dang masü saka sen aser mapang meindoki tashidak aneptettsüsa tesem aika mesemtetter lila. Asenoki asen kija ajungtsü aser asen kija akatsü bilemer, ajisüaka bilemdangdi, tang ama mapang nung ya asen kija ajungba aser akaba kisüng agi mekümzükteter. Ibai Nagaland küm 60 otsü nung yimten dang masü saka arogo dena tamakok anguba mapang asütsü.Lendong timtem mapang nungang asenoki tenla ki bushir saka tetsübu agi tenla ki tashi shibangtsüsa asenok putu nung atalokba ya asenok asoshi tamakok aser Tsüngrem tsüngdang taaktsüka lir. Joko asenok rongnung party politics aser tenla ki tasen yanglutsüba tebilemtsütem masü saka asen lima nung tang ama tashidak wara aser alima lendong agi menepa arudang nübortem anisüngzük aser taneptsü angutsüsa asenok mapa aser tamang na prongla renema alitsü asoshi inyak tenzükdi. Asenok asoshibo tang ama tejenokdak maka tebilemtsü tulu aruba tensa mapang ya temoatsü mapangang ka kümdaktsür, joko tang nungibo asenok ajaki asen kija ajungtsü aser asen kija akatsü dang bilema meinyaktsü telemtetba agidi. Aji oda, joko tang nungibo nisungi kechi ashir ta masü saka Tsüngrem o kü dangi yamai aru ta nübortem dang shitettsüsa Tsüngrem tenzükba mapa nung bendanga agüja inyakdi. Joko, asenok ajak pei mapa nung indangindanga inyakdi aser Nagaland ya benjong amongba lima ka dang masü saka shi nung aser tanüla nung taneptsü aser shisaliok tajung anguba lima ka kümdaktsüdi. Joko, ibai lanur putu, anungji asenok taintemi pei agitsü dang bilema menden raktepa memongli saka lanurtem shirnoki ochi agi asen lima meima yanglushiner parnok nem maongka aser tashi agütsüdi. Lanurtem rongnunga pei lima dang nungi rongsenang temeimba meima yimten aser arogo tenzüker lira, melenshiang aser ochi agi asen lima yanglushi tenzükang.