Tetezü maka ojang mali

~  P. Renthy Jamir.

O ya meimchir dang tambu asünung tapi agi purateta mejembir. Tetenzük nung o liasü aser o Tsüngrem liasü Yohan 1:1. Ao oshi teratet meteter nisung kari purapitet ta jembiba ya kong nungi ta asüngdangba agi ni Lai puti meteter sobaliba indang kaket zülur Ao oshi metetba nung takotet mongin ka dang tejangja purapitet indang tera, temen (origin) asüngdang. Saka pai langkodem ka langzüba nung tera mulong masüba agi ni angatetba kü shisa yari ibai zülur.
Iba ojang tali tejangjaba metettsü yangi Scientist aser Philosopher tetsüngda oren ka tama shidi. 1952 küm nung Scientist Bertrand Russell-i “The impact of Science on society” onük jembidang Greek nunger Philosopher tulusang Aristotle indang yamai ashi. Aristotle-ii tetsürji tebur dang nungi tepujang ishiba ta ashi, pai tetsür anaben tashi agi sürnung pai ashiba jangjatsü atema kinüngtsütem tebang nung tepuji mezüngdang. “Aristotle maintained that women have fewer teeth than men, although he was twice married it never occurred to him to verify this statement by examining his wives mouths.”
Asen Aor temeteter aikati o tetezü tejangja memetet jembir, zülur. Tatishitsü lemtamatar, matamabensar, mezüngbuba ya tenük telen mabensa, shi temang mokokmin telemta (Disabled), tanabuba ya matomalem, shisatsü mabensa hiki asem (silly person) ano yamala tetezü balala puratet, asatet, apitet, shisatet, item temesüktep aika lir. Aor oshi nung pura, puratet, purapuji, puralok item temesüktep aika lir. Aor oshi nung Pura, Puratet, Purapuji, Puralok item ya o tajungren nung kodanga mejembir. Item o ya tanur den timba jembir. Puratet tetezü o tasen yazü ka shitak küma jembitetba, Puralok süra ano tiazü ka bendenlokja jembiba. Item tatishitsü bena arudi.
Azü o Ak Lumongi ao. Tena kodang Lumongi modang yasür-a moatsü. Saka otsübo ochi atalokba ama jembir. Ano Koya o An chanu na ayongsepi aoba otsü shitak ama jembir, tena ayongsepi mao ano maotsü. Item dang ya tepuraba otsü ta ajar. Telephone nung ola angashitepa jembitetbaji Alexander Graham Bell-i Purapitetba ajanga lir. Ao oshi nungbo ya tai lir, yazü sür nung ochi ama yangluteter jembir dangang puratet ta ajar. Saka oset tasen ka yanglutetba dangbo purapitet ta majar. Invent tetezü jungjunga shisadanga imdangi arua asadanga asameyanger inyaktetba oset tasen ka. To make in imagination a new kind of tool machine etc, Tekolok amshia teka agi shitakba asameyanga asameyangtetba purapujiba masü motor, airplane steam Engine yamala. Nisung kati ki tasen ka tangar ki den balaka yanglunür, süra pai Architect Engineer dang ozü ki asütsü purapitetjang ta mashir. Saka ozü ki asütsü asameyangjang ta ashitsü. Ano telok kati otsü ka yia sayunür, jiloshi ka sayunür, süra parnoki Dramatist ka dangi or iba otsü/jiloshi asameyangjang ta mashitsü. Saka tajungtiba puratetjang ta ashitsü.
Purapujitsü, Puratettsü ano Puraloktsü item ya Dramatist Cinema Films Director mapa, saka practical nung scale shitak asazüka oset tasen asameyangteta yanglushibajibo scientist, engineer itemiang lir. Scientist tuluba Bertrand Russeli Philosopher tuluba Aristotle, aija jembibaji parnok inyakyim balala ta shinur. Tangbo joko tebur dang nungi tetsür tepu ishiba ta asübaji Aristotle-i purateta jembiba ta akümer, kechiyong pai pa kinüngtsü tepujia süng mezüngdangi tapi o jembi.
Anungji Alexander Graham Bell-i Telephone purapitet ta asüba purapitet ojang tetezü ratetji Ao oshi puratet ta asüba (origin) tera denbo mapet ta bilemer. Kechiaser purapitet ta asüba ojang ya puratet ta asüba nung pi ta talila ka inoksemba tang asütsü südi. Aser Aori puratet puralok purapuji item ya oset tasen ngutetba yanglutetba asameyangbaren tsütsü kodanga jembia maru. Saka item o ya puti ungertemi yazü purateta Yisu shia maru, Pa tasümang nütsüngtemi auyar ao ta asüba ama, Stefan lung agi onsettsü pai mejembiba tamaket o puraloktsü ta jembiba orentem nung amshir. Kechiyong Ao oshi nung tetezü maka ojang mali.