Teti Amangang, Tatem Maka

Tsüngrem temeim lir, aser shibai Tsüngrem temeim nung alir, pai Tsüngrem dak alir. 1 Yohan 4:16

Yohani tabensa temeimji kechi rasaa ashir. Pai ashi, “Temeim Tsüngrem nungi lir” (t.7) aser “Tsüngrem temeim lir” (t.8). Kechiba Khristantemi meimer Pai kuli pungu ratetta agütsür:

1)  Temeim Tsüngrem nungi lir

2)  Shidakba tabensa Tsüngremer temeim anidaktsü, bendanga agütsüba temeim

3)  Khristan kulisüba teyongtsüji temeim

4)  Temeimji Khristan teti tatem maka tejangja tekümtet lir, aser

5)  Obendangba anogo nung temeimji Khristan temulung alemdak lir.

Yangi “alir” ta amshiba O tetezüji “iba nung mapang indokba” lir. Teti amangba tetezü tatem maka taküm nung bendanga agütsüba. Kati bendanga agütsü nung pai/lai Tsüngrem O zünga, bushia aser maneni sarasadema Tsüngrem den mapang entokbaji dang masü, saka anogo tepiyong tia ajak nung  Tsüngrem lir ta metetta süidaktsüba lir.

Iba tapu ajunga nung asenok kati ka den meimteptsü ajungshia zülu. Kechiba? Kechiaser asenok metemsüaka Tsüngremi asenok dang meim. Anungji asenoki kati ka den koda meimteptsü? 1 Korint 13 bilemtetang. Temeimji taremzük, anükalem, tenük memeremer… ochi nung pelateper, ajak aremer, ajak amanger, ajak yimlar. Temeim kodanga majener. Shibai tangar meima alir pai/lai Tsüngrem den alir. Asenok aseni ajururtem den temeim jakla sayutsüla. Asenoki yamaji inyakdang Tsüngrem asenok den alir.

Oba, Ne temeim teti kü den aliba asoshi Ne tenüng asanger. Ni tanü ne nem bendanga agütsüdakjang. Amen.