Teti India mezüng südaktsür: PM Modi

New Delhi, Monupii (May) 26 (Agencies): Centre nung BJP-i aniba sorkar kümteter tanü küm pezü ajunger aser iba anogo nung Prime Minister Narendra Modi-i pa aser par party-i “teti India mezüng südaktsür” ta ashi.
Tesüiba küm pezü tsüngda terenlok ya lokti sentong ka kümdaktsüogo aser India ainba nung senso shia shilem agir ama tu kümogo. India nunger crore 125-i India ajungketdar, ta Modi-isa ashi.
PM Modi-i Twitter nung par sorkari ajangtetba osangtem den minute asem video ka sayu.
“Tebilemba tajung nung aser mulungsentsü ajak agi, onoki India tasen ka yangertsü atema lung azünger. Nübortemi sorkar dak tamang akar” ta paisa ashi.
Bharatiya Janata Party (BJP)-i sangküm general election atema mapa inyaktsü tenzükogo aser parnoki inyaktetbatem indang taresen den yimyim tasen ka sayaogo.
BJP-i “Saaf Niyat, Sahi Vikas” (Tebilemba Tajung, Tim Terenlok) ta yimyim ayimoktsüogo aser parnoki “2019 Mein Phir Modi Sarkar” ta ashir. 2014 election nung parnoki “Abki Baar Modi Sarkar” ta ashiba den atongtepa iba olen jembir ama ajiteter.
Taküm Monupii (May) 26 aser Aami (June) 11 tsüngda BJP lennirtem, minister tem aser party züngsemtemi nübortem den ajuruteptsü aser idangji parnoki Modi’er sorkari inyaktetbatem osang prokshitsü.
Amungnü (Deobar) PM Modi-i Delhi-Meerut Expressway nung jeep ka nung mener süitsü aser India nung mezüngbuba smart & green highway, Eastern Peripheral Expressway (EPE) sayatsütsü.
EPE ya sen crore 11,000 endoka yangluba lir aser Modi-isa audio conferencing ajanga central scheme balala ajanga teyari angur nisung 15 den sensaksemtsü.
Delhi nung BJP tir Amit Shah-i küm pezü ajungba tenüng nung osangbener senden ka nung o jembitsü.