Tetokteper shinga melii K G Kenye-i RS menden takok angur

Kohima, March 14 (TYO) : Naga People’s Front (NPF)-i aniba Democratic Alliance of Nagaland (DAN) candidate, K G Kenye den tetokteper shinga melii Nagaland nungi Rajya Sabha menden atema takok nguogo.
Commissioner & Secretary to Nagaland Assembly aser Returning Officer of RS Polls, N Benjamin Newmai-i tanü nikongtsütsü iba osang metetdaktsü.
March 4, 2016 nü Council of States (RS) indang election osang sangdongba nung tenüng agütsütsü asoshi tatembangba anogoji March 11 nü ta metetdakja liasü aser RS election atema tenüng agütsürji Kenye dang liasü, ta N Benjamin-isa metetdaktsü.
March 12 nü nomination paper reprang aser iba nung tashishitsü kecha mali ta bushitet aser ano tenüng meyipa agitsü asoshi tatembangba anogojia tanü liasü. Anungji, Returning Officer-i Rajya Sabha menden atema Kenye den tetokteper shinga melii takok angur ta telemtetba agia sangdong.
2016 küm tatemlen Congress MLA 8 aser NCP o JD(U) nung MLA kaka NPF den loktepba sülen züngsem 60 agi akümba assembly nung NPF nungi 48, BJP nungi 4 aser Independent MLA 8 lir.
NPF-i aniba DAN sorkar nung BJP dena lir aser parnokia NPF-i shimtetba candidate pusema nungittsü ta metetdakja liasü. Iba denji külemi Independent MLA 8-ia NPF den dena lir.
Nüngdak dang süra March 21, 2016 nü election agitsü akok.
Yaküm November ita taoba Nagaland nungi Rajya Sabha MP, Khekiho Zhimomi ajungbena asüba sülen iba menden tazüng liasü. Asür Khekiho indang kümsükji taküm April ita tembangtsü liasü.