Tetseo Sisters-i Mission Paani Waterthon nung shilem agi

Kohima, Aenjeti/January 28, 2021 (TYO): Mongolbarnü (26.01.2021) Mumbai yimti nung Mission Paani Waterthon sentong agiba mapang, Nagaland nungi nüngtugu kentener telok – Tetseo Sisters-i Paani Lizo (The Water song) ta nüngja agütsüba ken tasen ka tenloktsü.
Panni Lizo ya oshi asem – English, Hindi aser Chokri Naga nung atenba ken ka lir, koba tzü kümdanga/apayua amshitsü, tzü temerük ajemtsü aser temang merüka ayutsü atema tekümdangtsü sangoktsütsü aser iba mapatong nung sensopur ajaki shilem agitsü ayongzüktsü asoshi iba ken zülua liasü.
CNN News18 aser Harpic India na longjemer tenzükba Mission Paani mapatong ya India nung tzü/tzü adokdak kümzüka ayutsü aser merükmejua alitsü yimya süpatsü asoshi drive sentong ka lir.
January 26, 2021 nü, ghonda 8 atema Mission Paani Waterthon sentong ya LIVE sayaa.
Mission Paani Waterthon sentong nung, tzü kümzüka ayutsü aser merükmejuba maparen ajungkettsütsü asoshi bendanga inyaker tongtibang nübu, Lt. Col. SG Dalvi dena liasü. Tzünglu tzü bendena ayutsü asoshi pai anir mapatong tasen ka tenzük. Ano külen, India nung tzü peria manguba timtem achaayangtsü asoshi inyaker, Amla Ruia-ia aruagi denogo.
Kasa sentong nung activist tem talisa, alima nung climate activist rongnung tanobusang Licipriya Kanjugam aser India nung tzü agi timtemba pungbadaktsütsü asoshi inyaker, Naina Lal Kidwai na denogo.
Iba sentong nung, tzü kümzüka ayutsü aser merükmejuba ajungkettsütsü asoshi inyakertem mapa ngua terepranger aika ajungmesogo aser sentong nung classical dance nung takoktet kati tsüngsangba densema nüngtugu danseuse, Mallika Sarabhai, Esha Deol aser tanga aikati shilem agiba ngua telok saksalemdaktsüogo. Kasa mapang, Mission Paani atema campaign ambassador, Akshay Kumar-i shilem agiba den külemi Swarathma and Indian Ocean aser Shaan nungeri parnok indang music sayaa.
Maneni, iba sentong nung tongtibang nisung talisa Dr Harsh Vardhan, Union Minister of Health and Family Welfare, Laxman Narsimhan, CEO, RB Hygiene aser Gajendra Singh Shekhawat, Union Jal Shakti Minister nunger denogo.
Mission Paani Waterthon sentong, koba India indang Republic Day anogomung nung Network18 indang TV aser digital channel tem nung live saya, iba sentong ya tejangrar temi tanaben CNN News18 YouTube channel nung reprangtettsü akok.