Tetso College nung ‘Samvaad 2018’ sentong ayonga kaogo

Dimapur, Rongjui/September 24 (TYO): Dimapur kübok aliba Tetso College nung Rongjui/September 22 nungi 23, 2018 nü tashi 4buba ‘Samvaad 2018’ sentong ayonga kaogo, ta ketdangsertem osang ka ajanga metetdaktsü.
Iba sentong ya India nung tribal kintem tsüngda olemtep agiba sabang ka asütsü.
‘Coming Together for Social Change’ omen nung ajemdaker anogo ana tashi agiba senden ya tribal kintem tebilemtsü onük balala asadanga o lemteptsü aser tebilemtsü onük balala bentettsü nükjidong nung agia liasü.
Tetso College den longjema Corporate Social Responsibility (CSR) aser Tata Steel nati ayongzükba Dimapur nung ayongzükba sentong nung India nungi North-East state kin 34 tenüng nisung 117 shii dena liasü. Nagaland state dak alia, tribal kintem aliba Assam, Arunachal Pradesh, Manipur, Meghalaya, Sikkim aser Tripura state tem nungi iba olemtep senden nung shilem agiogo.
Kasa sentong nung Sumi, Zeliang, Bodo, Rabha, Ao, Khasi Boi, Kuki aser Pouamai Naga nunger densema kin aika liasü.
Samvaad sentong nung tribal balala nungi lanur lenirtem aruagi shilem agiogo. Iba mapang tribal kintem tsüngda telongjem maliba, ozüng alema benshiba, temesepba mozü achiba (drug addiction), mapa manguba, tetsür aser tebur bendanga amshiba aser tenem nung aliba tesem balala nung tzü-mopung libajen liromemedemba densema tebilemtsü onük aika lemsatepa liasü.
Tawa Nagaland (Dimapur) nung Samvaad sentong akaba ya round pezübuba asütsü. Mezüng senden asem ya Odisha (Gajapati), Tamil Nadu (Madurai) aser Rajasthan (Udaipur) yimtitem nung ayonga kaogo.
Iba senden akaba mapang linük kübok anüdoklen, anüolen tip aser anüolen tsütsülen nung aliba tribal kintem 85 nungi nisung 400 dak tema adenshia shilem agiogo.
“Samvaad sentong ya India ajunga nung agiyonga aoba mapang, tribal kintem telungtet aser tema nung asalentongtem lemsatepba ajanga tangatetba aser tesendaktep tajung renloka aoba ajitetogo.
Lokti yanglushitsü nung ajemdaker sentong nung shilem agirtemi parnok tebilembatem nümatanga lemsatepba aser onok dak tamang akaba ajanga pelaba lemsateper,” ta Tata Steel, Chief CSR, Sourav Roy-i metetdaktsü. Taküm küm atema tanüngba ‘Samvaad’ sendenji Chhattisgarh aser Jharkhand yimtitem nung ayonga akatsü metetdaktsüogo.