Tetsü mama yongdaktsüba ajanga linük rongsenkettsüng nung ajangzüker

London, January 30 (Agencies): Tanur nem tetsü mama yongdaktsüba ajanga linük rongsenkettsüng ajangzükba dang masü saka tetsü aser tanur naprong anema lidaktsür, ta bushisüngdang ka ajanga ngutetogo.
Scientists temi ashiba agi, tetsü kati tanur nem mama yongdaktsüba ajanga tetsü o tanur naprong ajangzüker.
Mama ayongba ajanga tanur ka terenlok tsütsü nüngdakba temelenshi angur aser kija o kibong ajangzükba den linük dena ajangzüker, ta parnoki ashi.
Mama yongdaktsüba ajanga küm shia mama cancer agi asütsü aliba tetsütem 20,000 kümzüker aser iba den külemi tanur 820,000 tashi tasüba nungi nokdanger, ta bushisündang ajanga ngutetogo.
“Mama yongdaktsütsü ajungshiba ajanga sensaker aser takar linüktem ajak nung rongsenkettsüng tsütsü terenlok agütsür,” ta Federal University of Pelotas, Brazil nungi Cesar Victora-i ashi.
Tanur nem mama kobika yongdaktsüdir iba sasep nung tanur ka shisatsü bushiba nung tashi tait akümer, ta ‘The Lancet’ kaket nung adokja lir.
Mama shitak yongdaktsüba ajanga tanur shirangshiji kanga masür aser ibaji ajanga kibong nung sen kümzüka yuteter, ta bushisüngdangertemisa ashi.
Aji dang masü saka mama yongdaktsüba ajanga tetsü ka mama aser nu menden cancer atongtsü aliba nungia jenbu’er, ta parnboki shisem.
Parnoki ashiba agi, alima ajak nung tanur ka sor ita trok tashi mama kija yongdangtsütsüla ta tetuyuba agüjaka noklang nung shilem 35.7-i ang mama yongdaktsür.
World Health Assembly-i linük ajak nung tanur ka nem mezüng ita trok tashi tanga chiyungtsü kecha magütsüi mama kija yongdaktsütsü aser 2025 tashi nungbo mama yongdaktsür noklang nung shilem 50 tashi danga jungdaktsütsü nükjidong yur inyaker, ta parnokisa ashi.
US, China, aser Brazil linüktem nung mama ayonger noklang nung shilem 90 aser Birtain nung shilm 45 tashi kümra iba jagi US nung sen billion dollar 2.45, China nung sen million dollar 223.6, Brazil nung sen million dollar 6.0 aser Britain nung sen million dollar 29.5 tanur temang tendanga anepaludang entoktsü aliba nungi kümzüka yutettsü, ta iba bushisüngdang ajanga ngutetogo.
Bushisüngdang 1,300 agiba sülen mama yongdaktsüba nung item tajangzük aliba nguteta liasü.
Iba tongutetba ya The Lancet kaket nung adoktsüogo.