Tetsü Oshi Dangi Meyiper

Mapang tatsüka tsüngda nisungtem tashitemetet akümba agi alima kanga renloka ogo saka nisungtem awashi aser jakla yimyabo tamajungba akümba agi nisungtem rongnung akümtsübutep aser teyaritep shisatsü samaa aoba asenoki ajangshir. Ibaji, talisa, kidang aser kaketreju nung pei tetsü oshi sendoka yutsür bendanger oshi nung bendanger otsü aser sobaliba angazüka tashitemetet akümba ajanga lir. Pi bendanger oshibo menataka jembir saka pei tetsü oshibo ojang kata junga madoktetter ta asüba lanu putu tensa ka nung asenoka liadokogo. Iba ama pei tetsü oshi mejembitetba putu tensa ya jungjunga bilemdangra, memenui asenok tetsü oshi samadoktsü sayatenyar ta asenoki angatettsüla. Atangji, asenok mulung anisüngzüktsü kaji asen tetsü oshibo tesamabo mesama saka alima tesem aika nung tapuyutsüka aser tesasatsüka pei tetsü oshi aika samaogo. Item rongnungji, America nung tamalen yimkümer kin ka tenüng agi Mashpee Wampanoag nunger oshi Wopanaak dena samaba otsü jembir. United States ta tenüng jateta makümdangyongi iba Mashpee Wampanaog kin yabo liasü. Parnokiang parnok aliba limai tangar bendngertem marudaktsütsü nokdang saka makok aitdaktsü aser meilongibo tesü arurtemang kibur kümer parnok nem yimkümer oshi aser sobaliba ajak amoksepdaktsü. Ajisüaka, asenoka angazüka benshitsüsa osang tajung kaji, iba oshi ya samadoker küm noklang ka dak tali süa orr külen, tang iba oshi ya meyipa bener arua jembitsü asoshi asentenshiba mapang ka lir. Iba oshi shia arua jembidaktsütsü asoshi merangba sentong ajanga Boston yimti anasa Massachusetts nung tanurtem dang Waponaak oshi sayuba kindergarten school ka lapoka lir. US nung  yimkümer kin oshi ka samaer aliba shia arudaktsütsüsa inyakba mapa nung ya sayatenya mapa kar ataloka lir. Küm metsü dak tali ogo, Wampanoag nunger lokti asoshi inyaker tetsür ka tenüng agi, Jessie Little Doe Baird den aonung pongmang nung par tetsü-tebou kari la dang parnok tetsü oshi shia arudaktsütsü asoshi par nübortem dang asüngdangteptsüla ta aiben jembia pongmang. Iba pongmangji asangsang küma lai 1993 küm nungibo par kin nung tebu tedi kar ajurua sensaksemer oshi nung mongintem kar teyari agia par tetsü oshi bushitsü tenzük. Parnok tia junga 1600s mapang England nungi arurtemi Roman ojang agi Wopanaak oshi nung Laishiba meyipa liasü. Anungji, idakji amendaker parnoki par oshi nung  olong 11,000 bendena osep yanglu aser 2015 kümbo joko Mashpee Wampanoag nunger tila tanurtem dang parnok oshi sayutsü atema kaketreju lapoka tenzük. Iba school nung parnoki tanurtem tsüraburtema tendaktsür aser kechisüdirsüaka parnok kidang bendanger oshi masü pei tetsü oshi jembitsü ajungshir. Wopanaak oshi angazükdak school nung ya oshi dang masü saka parnok tetsü-tebuo sobaliba dak aketba aluyimba, ango apuba aser chiyongtsü yanglubatem sayur. Iba ama pei tetsü oshi shilua arua jembidaktsütsüsa America lima nung inyakba sentongtem jagi asenoka ajungshidaktsütsüla aser government-isa masüyonga asenok rongnung tejangrar aser tetsü oshi meimertemi tetsü oshi aser sobaliba sayuba school lapoktsü asoshi bilemdangtsüla. Iba ama mapang ka nung, Nagaland nunga school ajunga nung class 1 nungi pei tetsü oshi nung Naga nunger sobaliba senmang angazükdaktsütsü asoshi state government-i lemtetbaji mapang shitak ka nung telemtetba shitak agiogo. Iba sentongji Naga nunger tetsü oshi samaya aliba kümzüktsü yokba sentong ka asütsü. Koba kin mesüra koba kibong nung südir süang, pei tetsü oshi mejembiba kin aser kibongji pei tetsü tebuo senmang mezüngmeshir asütsü. Atangji, tanga rongsen aser senmangbo samaaka tanaben melamelaa bener arutettsüa akok  saka oshibo tejembir kata mali samara, iba oshiji tanaben kin oshi küma jembitsüsa shisa arudaktsütsübajibo tamakoktsü mesüra kanga tasak asütsü. Tanü asen tetsü oshia tesamaleni odar saka tang tashibo tejembir aika lir, anungji tang ya kati ka ajungshitepa tangar tsüngdanga asenok oshisa tajungba aser tangazüktsü temelaba ta angatetdakja jembitsübaji, asenok asoshi nübortem atema rongsen bushitsüba mapa tongtibang ka asütsü.