Tetsü Oshi Koda Tongtibang onük nung otsünu zülutep

Mokokchung, September 10 (TYO): Ao Senden Literature Board (ASLB)-i achaayanga Honibarnü yangi Jubilee Memorial School Mokokchung nung “Tetsü Oshi Koda Tongtibang (TOKT)” onük nung ajemdaker otsünu (essay) zülu tetoktepba sentong ka liogo.
Iba tetoktepba nung Mokokchung district kübok aliba school balala nungi class 7-10 nung azünger kaketshir 84-i shilem agi.
Tetoktepba yimyaji züluba (written) nungi marks 75 aser tebang agi asüngdangba (Viva-voice) nungi marks 25 nung ajemdaker tendanga liasü.
Iba tetoktepba nung tedendanger (panel of judges)-temji; Prof. Lanunungsang (chief panel), I.Temjen Tzüdir, Aso Imsong, Imtipokyim, Sashimeren, Toshisangla, Nungshienla, Akangnungsang, Rev. O. Yashi Jamir, S. Wati Ozüküm, Dr. Temjen Jamir, Bendang aser Pangeraküm nunger liasü.
Shilem agirtemi marks 75 atema zülur külen viva-voice nungji tetsü oshi dak sentakba onük nung tasüngdangba kar den Ao zülumen (spelling), Ao ojang azüngba (pronunciation) aser parnok tasü taittem nungi tendanga liasü.
Iba tetoktepba nung mezüng jenjang angur nem kuli kaket den senpet sen 5000/-, tanabuba nem 3000/- aser tasembuba nem 2000/- ta agütsütsü. Iba den ano mulungsüsem (consolation prize) senpet nisung pongu shimteta parnok nema sen 1000/- (each) agütsütsü. Ano shilem agir ajak nem shilem agiba kuli kaket kaka agütsütsü, ta ASLB ketdangsertemi metetdaktsü.
Iba sentong takok ngua katettsüsa ASLB kübok aliba J.M Trust-i rongsen tenla tulu agütsüba asoshi parnok dang pelaba ASLB ketdangsertemisa metetdaktsü.