Tetsü sür alila nem akhum aguja Tomlinson-i ken aten

London, December 11, 2016: Taoba mapang One Direction kentener telok nungi dena alisang Louis Tomlinson-i “The X Factor” sentong nung tetsü leukemia agi shiranger asüla bilemteta pa indang mezüng ken aten.
“The X Factor” sentong nung ken atenba ajang nüngtugu akümsang Tomlinson-i tanaben iba sentong nung T-shirt temesüng aser jean tamang sentsü semer DJ Steve Aoki den külemi iba sabang nung pa indang solo “Just hold on” ken aten.
Taoba hopta asüla Johannah’er jabaso, kentner Tomlinson-i iba ken tenzüker pa indang temeyong nung meseper anünglen reprang. Paibo tetsü asüba kecha meshiaka tereprangertemi iba ken tetsü tasüla nem tenloktsür, ta reprangtet.
“Na onok dang nungi pilar külen nai parnok nem kechi shitaktsünür? Nai makok toktsü asü maneni merangdar ta shidaktsüner? Tatembang kati arudang nai kechi inyaktsüla? Nai kaket ji shibanger tanaben mazünger asü?” ta Tomlinson-i tetsü menungra ashi.
“Nü otsü tembanger na koleni aotsü?” ta pai sa shisem.