Tetsü tasoli meimba temeim

India kübok alir Naga nungertem yakanü Naga nunger nüchiso anguba anogo ka aser yashi India nüchiso anguba anogo ka ta kasa kin aser kasa nübortemsa süaka yimten nüchiso anguba anogo ana ashia-ashia mongogo. Iba tebilemtsüji Naga nunger asoshi kanga tebenja aser talisa India nunger tsüngdang asenok dak yimten tangatetba mali kümogo ta sayur. Ibaji dang masü saka ano Naga nunger yimten nüchiso bushir telokbo aika aküm saka yimten nüchiso atema jembitsü atemabo temesüba aküm ta akümba tensa tia yasa tebenjaba küma lir. Joko, Naga nunger rongnung Naga yimten nüchiso angutsü temeten aser teimla indang jembitsüba dang nungibo India temzüng kübok election nung shilem agitsü asoshi jembitsüang tejangraba kümogo. Iba jagi akhidangbo Naga nunger li nung India nunger election magidaktsütsü ta nübortemi nokdak saka tangbo Naga yimten tebilemtsü latettsü atema India temzüng kübok election agitsüla ta asüba nungang Naga nungertemi mulungsua anidaker. Naga yimten nüchiso atema raraba tongpang nung akhidang ajuruba tensa tia aser tanü ajuruba tensa tia na tetsüngdaji aji lir. Iba kuli kisüng agia Naga yimten tebilemtsü tatem küma latettsü atema mapang agir alitsüa akok. Ashiko, India nunger yimten yimsüsürtem mulungjang nungbo Nagaland nung tenokdangba kecha melii Indian election agiba agi Naga yimten nüchiso bushiba mapa ya süoki ia bilemtsüba mapa ka masü kümogo ta bilema alitsüa akok. Ano, iba amaji India nunger lenirtemi bilemtsüsa asenok Naga nunger yimsüsürtemi inyakba kaji asenok ajak India nunger kümogo. Atangji, asenoki Nagaland nung jembidangbo Naga nunger yimten nüchiso angutsüla ta jembir saka Delhi tongerbo India nunger chichiba akümer. Yimten nüchiso anguba anogo ana amongba amaji asenok sensoa tapu ana, Nagaland nung Naga nunger aser Delhi nung India nunger ta asenoksasa asenoki tangari ngua sentsü melener. Item ama nisungtem asoshi yimten nung telemtetba agitsübaji mapa kanga tasak, iba jagi Naga yimten tebilemtsü latettsü asoshi mapang agir asütsü. Kopiga asenok yamai yimten nung nüktapangtsü ? Naga nunger linük tenzükertem asoshia joko mapang mali, ajak tain akümer aser chirnurtem aikati iba tongpang nung menokdaknütsü. Iba tebilemtsüji kodang asenoki jungjunga bilemdangdir, tang ya Naga nunger koba telok nung lidir liang, ajak longjemer telatetba tajung ka magitetra, ashiko Naga yimten nüchiso asoshi ayimtenba ola ya pasasa anenadoktsüa akok. Asenoki asenok yimten nüchiso angutsüba temeten indang jembia jembia tilaba tilaba jembitetter aser yimten temeten masü saka rongsen bushir amato dang kümadoker. Joko, asenoki asenok lenirtem anogo aika chia mechiyong süngolio aser ali mejaka arem nung pei tetsü tasoli kümzüktsü atema timatemba anogotem amadokogo. Joko, asenoki pei taküm tenla agütsütsübaji yutsür pei tetsü tasoli asoshi taküm bendanga agütsürtem tenla dena mezüngshii kümdagi. Asenoki pei tetsü taso lima meimba dang nungibo rongsenang temeimba kümogo. Pei tetsü tasoli kümzüktsü asoshi pei tsürabur, pei kinungtsü aser pei tedongtenji toktsür arem nung lia linük tenzükba mapang aser mapatem to jungjunga amadokogo. Naga lima nüchiso atema azü tenla agütsürtemi tenla agütsüba langa tanü asenok tendak asenoki takok mengutetsüa akok, ajisüaka asenoki asen tsüraburtem pei yim aser pei lu ajunga rongdoktsür reshikangshiba otsübo mamatsüla. Asenoki asenok yimten temeten dang nungibo rongsenang taginüba asütsüa akok, saka asenoki asen tsüraburtem dak prangpong agi atsüngba, temeyong talak nung ajem janger timtemdaktsüba, tekolak alilen ser azük nung langkoshishi sendaka yur mersü ronga reshikangshiba aser tetsürtem dak tashiyim agi mapa tamajung inyaka mezüngmeshiba anogotembo mamatsüla. Item timtem reshikangshi ajuruba anogotemji asenok mulungjang nung yur, asenoki rongsen meimba aser asen asoshi jenjang tajung aginüba dang nungibo asen tetsü taso lima meimba temeim tuluba sür asen yimten  benjaba ya bentettsü asoshi ajaki shilem tajung agitsüla.