Tetsübu nem asenok mekokdaktsütsü: Madonna

Paris, December 10 (Agencies): “Asenok tetsübu nem mekokdaktsütsü,” ta shia, nüngtugu kentener, Madonna-i Paris nüburtem ajungmesogo.

Islamist kiralongrartemi ita ka tejaklen Paris yimti amakdang nisung 130 shi tepsetba sülen Madonna-i Paris kübok AccorHotels Arena nung ayongba kenten sentong nung ken tena yashi Brehostibar nü shilem agidang iba olenji sangoktsü.

“Paris nung hopta pezü tejaklen lendong atalokdaktsüba indang ni tanga bilemer. Ajisüaka, tetsübu tashi dang nungibo temeim tashi tuluba, anungji asenoki tetsübu nem mekokdaktsütsüla,” ta lai ajungmesoa ashi.

“Ni arishi küm 20 tain aiür ka asüdang yangi, Paris yimti nung ken atentsü tenzük. Kü mulungjang nung kententsü tejangraba inoktsüba atema Paris aser Paris nüburtem dang pelaba metetdaktsür,” ta lai shisem.

America tsür kentener, kenzülur aser actress arishi küm 57 tain Madonna-i France wako ka abener France linük ken, La Marseillaise kena yashi sentong nung atenba osang jangjaogo.

AccorHotels Arena nung kenten sentongji tembangba sülen Madonna-i taoba November ita 13, 2015 nü atalokba lendong nung asürtem bilemteta mangyimdak, Place de la Republique semdanga idakjia lai ken ishika tena asür nem aküm agüja liasü.