Tetsübu tapu ana

Nisunger libaliro nung kati ka akümtsübutepa alitsüba ya kanga tongtibang mapa ka lir. Anungji, nisung shiai tangar nem pa mesüra la akümtsübudaktsütsüsa alitsübaji kanga nüngdaker. Ajisüaka, akümtsübutsüba yabo ozüng ka agüja akümtsübudaktsütsü makok, ibajibo pei jakliro, sobaliba aser mapa agi aazüktsüla. Ibaji nisunger libaliro nung tetsübu tapu ka lir. Ano, tetsübu tapu tanga ka lir, ibajibo akümtsübur amai saka shitakba akümtsübur masü, nisung tamajung asüba agi tamajung inyaktsü tsübua akümtsübuba tetsübu ka asütsü. Aji oda, tanü ni asenok den tetsübu tapu ana indang lemsatepnüba nükjidongji asenokbo tangar nem akümtsübudaktsütsüsa alibaji asenok libaliro aser mapa agi aazüktsüla ta shinür. Alima nung telok aikati tangar nem akümtsübudaktsütsü asoshi mapa tamajung inyaker. Item rongnung, talisa, Muslim nunger kiralongrar telok ISIS aser al Qaeda nungertemi tashiyim inyakba mapatem ya asütsü. Item teloktemji tetsübutsüka, anungji ajaki tsübur saka iba tetsübujibo parnok asoshia lendongang asütsü, kechiyong ibajibo parnoki nübortem meima mapa tajung inyakba agi akümtsübur masü saka nisung tamajung asüba agi akümtsübur. Aji oda, item dangji nübortemi akümtsübur amato saka parnokji nübortem asoshi lendong mapang jenokdak aser teyari angudak masü. Ano, külen alima nung nübortemi US sepaitem kanga tsübur, kechiyong parnoki kiralongrar tesashi ket nungi nübortem kümzüker aser teyari nüngdakba bendang limatem tonga oagi parnok taküm aser rongsen kümzüka yarir aser parnok dak jenokdaktsür. Aji oda, asenoki tangar nem akümtsübudaktsütsü merangdang, tamajung inyaka tsübudaktsüba agi masü saka mapa tajung inyaktsüba agi, teyari agütsüba agi aser lendong timtem aser shisabolu nung alidang kümzükba agi tangari asenok akümtsübutsüsa alitsübaji kanga tongtibang lir. Tanü Nagaland nung talisa Aotsür Aortemi tangari asenok akümtsübutsüsa tangar yaritettsüla. Aji oda, tangar timtem nung alidang asenoki yaritettsüsa asenokji temeim nung aser rongsen nung takar asütsüla . Iba kasaji tangar tetsübu nung alidang asenoki parnokji yaritettsüsa aser parnokji asenok dak jenoktettsüsa asenok telongjem aser tangatetba nung tashi itta alitsüla. Tsüngremi asenok nem nübo, rongsen aser shisatsü peria moaja lir. Ajisüaka, asenokiang item temoatsütemji amshia tangari asenok akümtsübutsüsa melitetter. Item tashimaittemji asenoki asenoksasa bushitettsüla. Reprangdangra, tangar dang nungi asenoksa nütsüng nüboa teimba saka asenoki tangari asenok akümtsübutsüsa asenok melitetter, kechiyong asenok melongjem. Rongsen aser shisatsüa asenok nemsa temoatsüba amato moaja lir, saka itemji amshia asenoki tangari asenok akümtsübutsüsa melitetter, kechiyong asenoki asenok ajungtsü aser asenok akatsü asoshi dang bilema inyaker. Iba jagi tangari asenok akümtsübutsü melen mezüngmeshir. Iba tiaji asenoki tanü asen mapa, asen jakla aser asen sobaliba agi melenshidaktsütsüla. Aji oda, akümtsübuji angati masü saka aazüker süra tamasa asenok longjemtsüla. Asenok yimten telok balala nung dena alitsüa akok, kin kidong aser tzükong aser yimtsüng balala nungi asütsüa akok saka Aor ta asüba tenüng agi asenok ka küma longjemdaktsütsüla. Tasümang dang masü saka taküm alidang dena Aori Aor ka lendong timtem nung alidang toktsür moi yariteptsüla. Asenoki tasümang dang bushir aser asüpila sentep nung dang o tajung jembir, ajisüaka taküm alidang asenok o asenok na yaritepa sangteptsü aser ajungshiteptsübaji kanga tongtibang lir. Tongtibangsa, tanü ama government den raradang, kecha yimten tsütsüa mereprangi mesüra kinunger adianu mapii pei kini agütsüba yimyim angaa anidaktsübaji asenok ajak asoshi tongtibang asütsü. US sepai angudang tetsübu nung alirtem mulung süngzük angu ama, asenok angudang tangar timtem aser tetsübu nung alirtema mulung anisüngzüktsüsa asenok litettsüla.