Tetsübu temoatsütem – T. Ken 128:1-6

Tanü asenoki Kibuba tsübuba jembiba kangabo mangashir. Teti Kibubaji kotak tembar ka, shibai menürema asenok den jajar tembar ka ama bilemer. Saka tekong ka nung ashir, “shibaisa Kibuba Tsüngken tsübur, pa temoatsü”.
Kibuba tsüngken tsübuba tetezü kechi? Iba tetezü süngmanga akhüm tsübu agütsüba. Iba tetezü asenoki pa matitanger. Pa den masayar. Pai meinyaktsü aliba, inyakdaktsütsü asenoki memeranger. Israel nungeri Kibuba akhüm metsübu. Parnoki Pa atitang. Parnoki pa ozüng den asaya aser parnok alima den koda anasatepa alitsü merang. Anungji Tsüngremi parnok azüoktsüsa aküm.
Kodang asenoki atangji Tsüngrem tsübudir Pai lemang asem nung asenok moatsür. Mezüngbuba, Pai asenok jajaba nung moatsür. “Nisung shiai Pa lemang nung jajar, pa temoatsü” (t.1). Iba tetezü asenok mapa aser asenok jakla Temeshi.
Tanabuba, Tsüngremi asenok mapa nung moatsür. “Kechiyong ne ket agi züsentetba nai achitsü. Na tepela alitsü, aser ne den junga alitsü” (t.2). Karbo pei mapa nung mepelai lir. Saka asenoki Tsüngrem dang tashi angaa lira kechi mapa südir süang pelaseta inyaktsü. Kodang asenoki Kibuba tsübudir, asenoki pela shishia mapai aotsü aser pelaa alitsü.
Tasembuba, Tsüngremi asenok kibong moatsür. “Ne kidang kilung nung ne kinüngtsüji tejang atangba chinilashi dong ama alitsü. Ne chirnurtem, ne langbang meketa olive süngdong ama alitsü” (t.3). Iba tetezü ajak kibong ka akatsüla-kibong akümtsü, kiyi aotsü ta masü, kijaji kibong tulu ka ama liang. Iba tetezü kibong na temoatsü ka asütsü. “Ajiang, Kibuba tsüngken tsübuba nisungji yamaji alitsü”(t.4).
Kibuba tsüngken metsübui kodanga teli. Paji ne Tsüngrem lir, saka nai pa dang süngmangtsü aser akhümtsübutsü pa dak langa lir. Pa tsübuang. Pa lemangtem nung jajaang aser pa temoatsütem agizükang.