Tetsüngda nung nokdakang (T. Ken 106: 16-23)

Asenoki Mosaji tanishir tulu aser ozüng yanglur tulu ka bilemer, atangji pa tulutiba rongnung ka liasü. Saka nai Mosaji temepishitsür tulu ka shisadangogo ma? Sarasademba taküm ka ta nai metetter ma? Pa sarasademba Laishiba nung aiben zülua lir. Kodang Israel nungeri Tsüngrem melen nashi chanu ka yanglur külemtsü tenzük, Tsüngremi parnok o bendangtsü renema liasü. Saka Mosai tenemi atu aser tetsüngda nung noktaker mepishi. “Aji asünung pai parnok samatsütsü ta ashi, pai shimtetba Mosai, parnok Pai samaja lir ta, Pa ain adokba nungi meyipdaktsütsü, Pa madang tetsüngda nung noktaka ali” (t.23).
Israel nunger Ejip nungi kümzük aser Sinai tenem, kong Tsüngremi Mosa nem ozüng agütsü, idakji noktaka liasü. Saka parnoki süngyanglu ka yanglu. Tsüngremi asenok asoshi inyakba asenoki koda karaa amadoker. Asenoki meyipa aor aser temelentep den alir.
Mosa pa kija asoshi parnok temenen nungi tajangzük agitsü koka liasü. Tsüngremi Mosa dang ashi, “Mosa, ni ne den kin tasen ka tenzüktsü, aser joko Israel nungerji Abraham chirtem masütsü. Parnok Mosa chirtem alitsü.” Saka Mosai langzü, “Masü, Kibuba, nai item nüburtem meimer. Parnok ne nübur lir. Parnok o tebendang.” Tsüngremi parnok temenen o bendang saka kinji meraksatsü. Atangji, Mosai parnok asoshi inyakba maginü, aser parnoki pa anema jembi.
Tsüngrem tenüng sangdi, tanü kotak nung asenok asoshi temepishitsür ka lir, Kibuba Yisu Khrista, shiba Tebu Chuba langbang madang asenok asoshi mepishia noktaka alir (Ibri 7:25). Pai aser Tebui asenok meimer aser asenok taküm anir aser yanglur.
Mepishibaji tamanger tenzükba mapa nung tongtipangtiba ka lir. Naa temepishitsür ka asü? Tangari ne sarasadem teyari nüngdaker. Mosai inyakba ama inyakang aser tetsüngda nung noktakang.