Tetsür ajakji tangar dang nungi balaka asütsüla: Salma Hayek

October 12, 2015: Salma Hayek-i tetsür tanurtem ajak pei sasa nokdakteta tangar dang nungi tajungba akümtsü aser pei nükjidong atongtsü asoshi parnok tasü itdaktsütsüla, ta ashi.

Lai, tetsür ajaki pei sasa tangar dang nungi balaka ama bilemtsüla, ta shisem.

Arishi küm 49 tain, actress Salma shiba arishi küm 8 jala Valentina tetsü lir, aser lai tanü asüng tensa nung intetter lanurtem dak temulungtetba kanga tashi tait alir, ta bilemer.

Taoba hopta Beverly Hills, California nung Variety-i ayongba ‘Power of Women’ sentong nung Time magazine dang Salma-i, “Tang tensa lanurtem dang, tangar dang nungi balaka asütsü merangtsüla ta ashitsü nüngdaker. Tangar dak nendaker melii pei kechi inyaktettsü ta shisadangba lanur kaka asütsüla,” ta ashi.

“Tetsürtem dang tangar tetsürtem ama malitsü ashitsüla. Parnok dak sempet kechi lir, kechi inyaktettsü aser pei sasa pei bushitsü nüngdaker,” ta lai shisem.

Salma ya ‘Chime for Change Charity’ atema bendanga agüja inyakba ajanga nüburtemi kanga tushir aser lai tettsürtemi memunui alima nung temelenshi bener arutsü, ta ashi.

Lai, “Tetsür ola ajanga alima nung temelenshi bener arutettsü ana nung lir, ajisüaka asenok tetsürtemi ibaji mangatet aser memetet. Asenoki asen sasa bushisüngdang masür. Asenok mapang kanga talangka teburi atongba sentong nung dang anidaka arur. Asenoki kodanga asen tashi daka alanga meinyakdang,” ta ashi.