Tetsür anema inyakba nokdangtsü atema J&K Angh-i ozüng ana agizük

Srinagar (Jammu & Kashmir), Monupii/May 17 (Agencies): Tetsürtem anema inyakba mapatem nokdangtsü nükjidong nung tanü Jammu & Kashmir Angh, NN Vohra-i ozüng ana agizükogo, aser ozüng ana rongnungji, arishi küm 12 ser tekübok tetsür tashiyim amshia raksatsürtem nem tasüba temerenshi agutsütsü densema lir.
Tanü state Angh-i, Jammu & Kashmir Protection of Children from Sexual Violence Ordinance, 2018, aser Jammu & Kashmir Criminal Law (Amendment) Ordinance, 2018 agizükba sülen tanü nungi item ozüngji benoker, ta sorkar otongdar kati metetdaktsü.
J&K densema linük kübok state balala nung tetsürtem anema inyakba mapatem nokdangtsü atema state nung Criminal Laws yanglushitsü nüngdak ta reprangteta liasü, ta otongdarisa metetdaktsü.
Taoba ita Ato kilonser, Narendra Modi leniba nung Union Cabinet-i arishi küm 12 ser tekübok tetsür chanu taküm raksatsürtem nem tasüba temerenshi agutsütsü atema courts nem temelaba agüja ozüng ka agizüka liasü.
Jammu & Kashmir Criminal Law (Amendment) Ordinance, 2018 ozüng kübok arishi küm 12 ser tekübok tetsür raksatsürtem nem tasüba temerenshi agütsütsü akok, mesüra küm 20 tepoukdak ayutsü akok mesüra akumli piyong tepoukdak ayutsü akok, ta paisa metetdaktsü.