Tetsür aser tetsür chanutem temeden dak sendakba nung sentong aka

Dimapur, Tsüklai/February 21 (TYO): Mahila Shakti Kendra (MSK) aser District Task Force (DTF) BBBP Longleng, Nagaland na senteper, Women & Girl Child Rights dak sendakba nung naroküm agütsüba aser temetettsü balala agütsüba sentong ka February 19 aser 20 nü Longleng district kübok Yaongyimchen aser Yachem yimtsüng nung agiogo. Iba sentong ya tetsürtem nem parnoki koktettsüba tem metetdaktsütsü aser nüburtem tsüngda tebendang meli-i alitsü aser lokti ajungtsü asoshi peisasa angateta inyaktsü atema ajungmesotsü nükjidong nung ayongzük.
District coordinator Tutinungla Phom-i, tetsür aser tetsür tanur dak sendakba nung ken o aser scheme tem indang tongmelang agi metetdaktsü. Lai tetsürtem talisa mashisaa aliba tetsürtem aser mama yongdakja aliba tetsürtem daka parnok atema maongka balala agütsüba bushia agitsü ajungshi. Tetsü ka health aser tetsür tanur nem kaket shisatsü agütsütsü koda tongtibang, iba indanga jembia liasü.
Lai tetsürtem atema agütsüba scheme balala aser office tem; One Stop Centre, Women Helpline 181 (Police, Hospital, Ambulance services, Legal aid, Protection officer, Video conferencing); Antenatal check-up for pregnant Women (ANC); Pradhan Mantri Matritva Vandana Yojana (PMMVY); Janani Surakshaj Yojana (JSY); Sukhanya Samriddhi Account indang metetdaktsü. Laisa tsürapurtem dang tarutsü nung tetsür tanur kaketshisatsü bushiyonga aotsü atema aser kibong kümdaktsütsü asoshi sen bendentsü ajungshiba den tetsürtem atema Mahila Shakti Kendra-District level centre indang metetdaktsü.
WWO, MSK Longleng, Phungla Phom-i, shisaliok aser tanga lenla nung junga inyakteter tetsür chanu ka nem aser tetsü kati tanung tebur 5 aser tetsür 2 ta la kijai mesütetba atema tetushi agüja liasü. parnok nem sempet den kuli kaket agüja liasü. Maneni parnok dang sentong balala nung shilema gitsü aser parnok temeden asoshi nokdaktsü ajungshi.
Iba sentong ya MSK District coordinator Shitung Phom lenisüba kübok aka aser village council züngsemtem, Arogo lenirtem, Ashas & Anganwati, tetsür aser tetsür chanu tem iba sentong dena liasü. Sentong nung ajak agi nisung 350 shi dena liasü, ta DPRO Longleng sangdong ka ajanga metetdaktsü.