Tetsür chanu asem Myanmar nungi kümzük

Imphal, September 8 (Agencies): Nisung shibelener ket nungi maneni Manipur police-i tetsür chanu asem Brehostibarnü Myanmar nungi kümzükogo.
Police osang ka ajanga ashiba agi, Churachandpur district police, Special Investigation Team (SIT) aser Tengnoupal district police aser Child Welfare Committee (CWC) Churachandpur teyari ajanga tetsür chanu asem ya Rangoon nungi kümzükogo.
Taoba hopta police temi tetsür chanu asem kümzükba sülen, nisung shibelenba bushisüngdangtsü atema Churachandpur district-i SIT ya kümteta liasü.
September 2 nü Churachandpur district, Manipur police anti human trafficking unit ajanga tetsür asem kümzüka liasü aser parnok rongnungi anabo tanur liasü. Iba dak sendakba nung police temi tetsür asem den parnok pezü, nisung shibelenba atema aija puogo.
SIT nung ya district police ketdangser parnok pongu dena lir aser iba telok ya September 3nü tetsürtem shibelenba dak sendakba nung ken o benoka aliba tem bushisüngdangtsü asoshi kümtet. Item ken o tem bushisüngdangba mapang kuli agütsür parnok 16 indang kuli mangaokogo.
Kasa mapang nung nisung shibelenertemi anir ao ta, temolung melemi bilemba ken o pongu SIT puri tang tashi nung agizüka lir, ta osang ajanga metetdaktsü.
Item tetsürtem kong aliar jangjatsü atema SIT puri Tengnoupal district police SP dang iba ken o nung sendaka aliba nisung kar aputsü asoshi mepishiogo, shirnok tang Myanmar kübok Tamu jila nung telidak lir, ta kasa osang ajanga metetdakstsü.
Tengnoupal district police teyari ajanga CWC Churachandpur puri Myanmar kübok Rangoon tesem nungi taoba ghonda 48 tsüngda nung parnok asem kümzükogo aser iba den külemi Churachandpur nungi tanur shibelenba nung densema alir ana dena puogo.
Tetsür shibelenba nung shilem agir anaji IB Tang nungi Tuolkhom kinungtsü Irene Ngaihoih (35) aser Thingkangphai yimtsüng nungi Ginminthang Simte kinungtsü Nengneingai (25) ta jangjaogo.
Iba ken o nung pua alirtemji police ket nung anogo ti tashi ayutsü asoshi okadak ka ajanga tetuyuba agütsüogo. Tang tashi nung Churachandpur nungi Myanmar ajanga Southeast Asian linüktemi nisung shibelenba nung shilem agir parnok trok tashi SIT puri puogo, ta kasa osang ajanga metetdaktsü.