Tetsür dak tashiyim inyakba aser lokti menentem anema senden ka ayong

Mokokchung, Aami/June 15 (TYO): Lokti nung tetsür dak ozüng alema tashiyim inyakba aser lokti temenen mapatem anema Rogonü (Hogulbarnü) lokti senden tulu ka yangi Mokokchung town police point nung kaogo. Iba senden ya Mokokchung Town Aor Telungjem, All Ward Union Mokokchung, Mokokchung Town Lanur Telungjem, Ao Senden, Watsü Mungdang aser Ao Kaketshir Mungdang parnoki lungjemer ayongzük.
Iba sentong nung Watsü Mungdang tatong tir Wt. Temsüjungla menden liasü aser Mokokchung Town Aor Telungjem tir Wb. I. Tsüien Jamir, All Ward Union Mokokchung tir Wb. R. Ayim Lkr, Mokokchung Town Lanur Telungjem (MTLT) executive member Wb. Lanu Pongen, AKM tir Sp. Imkongwati, Watsü Mungdang tir Wt. Maonginla aser Ao Senden tir Wb. Moatoshi nungertemi shilem agia tetsür anema tashiyim inyakba aser lokti menentem anema tebilemba balala lemsatepa liasü.
Iba lokti senden nung teloki bangzüng asem (3) renema liasü. Itemji;
1. Tetsür anema tashiyim inyakba aser lokti temenen den raratsü atema, tashi tait tentet ka alitsü. Iba ya Mokokchung town nung aliba Aor lokti tentet ajak tashi nung inyaktsü.
2. Kodang tashiyim agi shi azüapong (rape) mapa atalokdir, shingaia aibelener-ji kümzüktsü memerangtsü; saka, pa/la taküm kümzükteta tsüngden chiokdak (jail) yua lia senso kari danga pa agizüktsü merangra, tagizüker khuret asütsü, aser shibai agizükdir asen Aor loktiliba kecha nunga temeden shilem magütsütsü.
3. Tetsür anema tashiyim mapa aser lokti temenen den raratsü asoshi Mokokchung town Ward ajak (18 wards) nung “Vigilance Team” ka tentetsü aser iba ‘Vigilance Team’ ya Ward Yimden-i tetsür tebur meyoktepa akümba team ka shimtsü, aser iba team ya Ward Yimden kübok alitsü aser yimden den külemi teka amtepba mapa inyaktsü.