Tetsür dak tim mesüi kongshiba atema taxi driver ka apu

Dimapur, August 14 (TYO) : August 13, 2015 nü Sechü (Zubza) P.S nung zonal taxi anishir kati Naga tsür ka dak tim masüba mapa inyakba indang ken o ka benok.
La Dimapur nungi Kohima-i zonal taxi ka nung aodang iba ya atalok. Lai ashiba agi, gari nungji driver medeni par pezü mena liasü aser la saktsüba timtem aliba agi la tejaklen amen aser tesülen apuani tain ka den tsümar ka amen, ta Sub-Divisional Police Officer & PRO, Kohima-i sangdong ka nung metetdaktsü.
Parnok Dimapur nungi Kohima-i apusoa aodang driver jagi parnok ajak den kanga junga dang jembi aser parnok jembia aodang aiürla aser driver na kin kasa ta metetteper tena kin indang oshi agi jembiteptsü tenzük, ta Kohima Police-i ashi.
Parnok Chumukedima police check-gate adena aoba sülen driver jagi tetsürla indang tepi aser teberem nung kongshia temeyong agi amet. Mezüngbo lai driver jagi memeteti kongshi ta bilem saka maneni la dak kongshiba agi lai driver dang mokongshitsü ashi aser amokmeren. Ajisüaka driver jagi pai kongshinür ta langzü aser odang kongshi, ta tetsürlai ken o benokba nung shia lir.
Tetsürlai jagi tesülen meyiper tambusang dang tenük agi driver-i la dak kongshiba indang tuyu saka tambusang jagi kecha mashi aser tanüngba nisung ana jibo mejanga orr liasü. Driver jagi gariji asaa kolakoshia ani aser iba sülen pai tetsürla dang la pa anasa tali arudaktsütsü atema yamaji ani ta ashi. Paisa tetsürla dang la tobur ajungba indang ashi.
Parnok Piphema matong tashi driver jagi la dang kongshi, ajisüaka tetsürlai tatalokba osangji whatsapp ajanga lar medemertem dangi yok aser laisa lar medemer ka dang phone ser la yariang ta ashi.
Piphema nung anenzükdang tetsürlai parnok külemi mener aoba apuani na dangi ao aser tatalokba osang ashi, saka idangji tambusang jagi “Moi jani ase, Eku nohoi, hoi jabo” ta Nagamese agi langzü, ta tetsürlaisa ashi.
Laisa tsümarsang dang tatalokba osang ashi aser pa dang driver mittsü asüngdang saka pai ibaji inyaktsü menangzüktet.
Iba sülen tetsürlai taxi indang registration number noksa tangok aser ibaji lar medemertem dangi yok. Piphema nungi parnok apusoba sülen driver jagi la dak mokongshi saka parnok Zubza tonga aodang maneni pai tetsürla dak kongshitsü merang saka idangji tetsürlai pa dak asaloktsü aser ibaji serbo Kohima tonga ao tashi khen danga mokongshi
August 13, 2015 nü tetsürlai police station nung F.I.R benokba sülen police-i bushisüngdanga orr iba aonungjisa 10:00 ako meta Kohima nung driver ji apu.
Iba nisungji Mongchen nunger Nungsangjungshi’er jabaso Limakumzuk ta jangjaogo aser pai amshiba Alto gari (NL 07/T 0164) dena apu, ta Sub-Divisional Police Officer & PRO, Kohima-isa metetdaktsü.
Iba dak sendakba nung Sechü (Zubza) P.S nung ken o ka benokogo aser August 14, 2015 nü tai tonglokja alisangji Chief Judicial Magistrate Kohima dangi anir oa ken o ka benok aser iba sülen tepuokdak yua lir, ta Kohima police-isa metetdaktsü.