Tetsür den tsüngsangba atema Assam CM Gogoi-i tatok meshi

Guwahati, July 29 (Agencies): Taoba mapang linük Tir APJ Abdul Kalam asüba asoshi linük mangyimba mapang ka nung Bodhbar nü Assam, Golaghat district nung sentong ka alidang Assam chief minister Tarun Gogoi-i süngolu nung inyaker tetsürtem den tsüngsangba atema pai tatok meshiogo.
Taoba Tir nem akhümtsübu tila kata magütsü ta state nung opposition-i Gogoi aija state BJP Tir Siddhartha Bhattacharya-i, “Honibar nü pa (Gogoi) tembar tajung aser taoba Union minister BK Handique asü aser Hombar nü asen taoba Tir asü, aser yangi kanga mazüngi tsüngsanger aser golf asayar ka (Gogoi) lir,” ta ashi.
Golaghat district, Hatikhuli nung aliba amalgamated plantation hospital sentong nung Gogoi tsüngsangba sülen new Misa Club nung pai golf course ka lapokja asaya, aser item noksaji local TV channel balala nung sayuba mapang nungi tenzüka taitsüba o aika liasü.
Iba dak sentakba nung mapang ajak nung odi-odi-a jembisang Assam chief minister Gogoi-i, “Sentong ka nung tsüngsangba ajanga ni aibelenogo. Tia makai APJ Abdul Kalam asüba atema mangyimba mapang ka nung ni yamaji meinyaktsüla ser nung inyakogo. Ni iba asoshi tatok meshir. Ajisüaka golf asayaba aser saisapongbajibo pelatepba ka masü,” ta ashi.