Tetsür ka selfie agidang Brahmaputra nung arakset

Guwahati, June 12 (Agencies) : Cotton College, Guwahati nung azünger tetsür kaketshir ka Honibarnü selfie ka agidang Brahmaputra ayong nung arakseta asü, ta police-i metetdaktsü.
Tetsürlaji Chemistry azünger Archana Timungpi liasü aser la ya Karbi Anglong district kübok Bokajan nungi liasü ta jangjaogo. La ya Swahid Kanaklata Hostel nung liasü, ta police-isa metetdaktsü.
Archana den medemer ka Brahmaputra ayong nung aliba Umananda asetkong nung Umananda tekülem kidang liasü. Tena yashi 11:00 ako meta tekülem kidangi ao ta medemertemi ashi. La asüba osangji nikongtsütsü 2:00 ako meta angashi, ta police-i ashi.
Archana aser medemer na tekülem ki tezülen selfie agitsü atema ao aser idangji la lung ka nung metsüdaker ayongi ai arakseta asü, ta tenük kuli agütsürtemi ashi.