Tetsür kati anidakba sülen Benedict Cumberbatch security akangshiogo

Los Angeles, November 1 (Agencies) : Tetsür kati pa sülen anidakba aser par kidang ribbon temerem yutsüba sülen Hollywood actor Benedict Cumberbatch-i police nem osang sangoktsü aser security meshiogo.
Pa taküm lendong nungi jenbua alitsü atema Benedict-i police aser security experts dang nungi teyari meshi, ta osang ka ajanga metetdaktsü.
“Benedict-i pa lendong nungi jenbua linür. Pai police den jembi aser pa taküm kümzüka ayutsü atema teinyaktsütem inyakogo. Paisa theatre management den osang metetpelaogo” ta Sunday People osang ajanga ashi.
London nung aliba Barbican Theatre nung Benedict-i play ka nung Hamlet ama shilem tagidak lir aser iba tesem nunga security akangshiogo. Police-ia tetsürla mittsü tetuyuba agütsüogo.
Bendedict aser pa kinungtsü Sophie na den ita pungu jabaso aliba kidang tetsürla jagi ribbon temerem yutsü.
Pa sapulaji aiben par kidangi aruogo aser anaben tashi lai ribbon temerem yutsü. Khen par gari nung aser khen par kichiba nung aleneta yutsü.
Iba inyakyim ya Arthur Conan Doyle-i mezüng züluba Sherlock Holmes novel “A Study in Scarlet” nung ajemdaker inyakba ama ajiteter.