Tetsür kati kinü tanur 3 aser nisung tain 2 dak kotari agi atsüng

New York, Rongjui/September 22 (Agencies): Rogonü New York nung amendaker aliba daycare center nung inyaker tetsür kati lasasa la teka marang tsüngda kinü tanur asem dak kotari agi atsüngba sülen la police temi puogo.
Tetsürla ya arishi küm 52 lir, shiba nisung tain ana dak dena kotari agi atsüng, la temang tajungba lir, ta New York City Police Department, assistant chief of patrol-i sangdong ka ajanga metetdaktsü.
Lai kechiba iba mapa ya inyak ajibo tang tashi police temi mejangja.
Kinü tanur asem rongnung tetsür ana aser tebur ka densema lir. Parnok asemprongla ya mozüki-i temang kanga mejungi anir ao saka tangbo tajungba lir. Prosecutors-i ashiba agi, par asem ya ka anogo 13, ka anogo 22 aser ka anogo 33 tain liasü.
Tetsürla yagi arishi küm 31 tain tebur ka daka kotari agi atsüng shiba tanur asem rongnung ka tebu asütsü ta bilemer. Iba tesem nungi police temi kotari ana ngutetogo.
Maneni tetsür ka dak kotari agi atsüngla ya arishi küm 63 liasü. Police temi taoba mapang nung nisung tani anaprongla ya arishi küm 30 tsüngda liasü ta metetdakja liasü.
“Yirur alirtem ajak temang tajungba akümtzü onoki sarasadema atar. Onoki item kinü tanurtemi tashi ita iba timtem tekangshi ajangtettsü imlar,” ta Queens District Attorney Richard Brown-i ashi.
Police temisa ashiba agi, iba lendong atalokba mapang nung tanur teku aser tsürapur aika liasü.
Kotari agi atsüngba nisung tain anaprongla ya iba kidang lia liasü, saka aija alila yabo iba kidang malir, ta police otengtari ashi.
Brown-isa tetsürla ya mozüki ka nung temang anepaluba den tekolok shisatsü tendangdar, ta ashi.